Երէկ, Պէյօղլուի Ս. Երրորդութիւն եկեղեցւոյ մէջ տեղի ունեցաւ Արեւագալի հոգեզմայլ արարողութիւն, որուն հանդիսապետեց Տ. Արամ Արք. Աթէշեան։ Ներկայ էր նաեւ եկեղեցւոյ քարոզիչ Տ. Եղիշէ Վրդ. Ուչքունեան։ Երգեցողութիւնները կատարուեցան Նշան Սրկ. Չալկըճեանի գլխաւորութեամբ։
Թրքահայ վաքըֆներու միութիւնը երէկ երեկոյեան ժողով մը գումարեց Ս.Փ. Ազգային հիւանդանոցին մէջ:
Նիստի մասնակիցները ծափահարութիւններով ողջունեցին Պետրոս Շիրինօղլուի եւ Տիգրան Կիւլմէզկիլի համատեղ ներկայութիւնը:
Սուրբ Խաչ դպրեվանքի սանուց միութեան նախաձեռնութեամբ երէկ ընդհանուր քննարկում մը տեղի ունեցաւ՝ զանազան սերունդներէ շրջանաւարտներու մասնակցութեամբ։ Միութեան Նարլըգաբուի հաւաքատեղիին մէջ կազմակերպուած այս հաւաքոյթը կը հետապնդէր անդամներու պահանջներուն եւ մօտեցումներուն վերահասու դառնալու նպատակը։
Պաքըրգիւղի Տատեան վարժարանին մէջ նախընթաց օր տեղի ունեցաւ՝ Ամենայն Հայոց բանաստեղծ Յովհաննէս Թումանեանի յիշատակին ձօնուած ձեռնարկ մը։ Որակեալ հանդիսութեան ներկայ գտնուեցան Պատրիարքական փոխանորդ Տ. Գրիգոր Ա. Քահանայ Տամատեան, Տ. Կորիւն Ա. Քահանայ Ֆէնէրճեան եւ Տ. Շահէն Քահանայ Օհանեան։
Էսաեան վարժարանի միջնակարգի բաժնի ճատրակի խումբը եղաւ Պէյօղլուի շրջանի ախոյեանը։ Անցեալ շաբթուան մէջ, այս գաւառակի դպրոցներու մասնակցութեամբ կազմակերպուած մրցաշարքը հանդիսացաւ իսկապէս բարդ մրցակցութեան մը թատերաբեմը։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ նախագահեց Գուզկունճուքի Ս. Գրիգոր Լուսաւորիչ եկեղեցւոյ առաջին Արեւագալին, որու ընթացքին տուաւ նաեւ օրուան պատգամը։ Հոծ թիւով հաւատացեալներու ներկայութեամբ տեղի ունեցան արարողութիւնները, որոնց մասնակցեցան նաեւ Տ. Շիրվան Քհնյ. Միւրզեան եւ Տ. Պետրոս Քհնյ. Պուլտուքեան։
Ամենապատիւ Ս. Պատրիարք Հայրը միջամտեց Սուրբ Փրկիչ Ազգային հիւանդանոցի եւ Գարակէօզեան Տան միջեւ ծագած տհաճ խնդրին:
Նորին Ամենապատուութիւնը Պետրոս Շիրինօղլուի եւ Տիգրան Կիւլմէզկիլի հետ շինիչ հանդիպում մը ունեցաւ՝ ընդգծելով համայնքային շրջանակներու դրական ակնկալութիւնները, որպէսզի թիւրիմացութիւնները յաղթահարուին եղբայրական սիրոյ ոգիով: Ճաշասեղանի շուրջ կազմակերպուած տեսակցութեան ներկայ էին նաեւ խումբ մը ազգայիններ:
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան նախընթաց օր հիւրընկալեց համայնքիս երախտաշատ բարերարներէն Արէտ եւ Մոնիք Երկանեան ամոլը։ Հանդիպման ներկայ էր նաեւ Պատրիարքական փոխանորդ Տ. Գրիգոր Ա. Քհնյ. Տամատեան։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան նախընթաց օր Գումգաբուի մէջ հիւրընկալեց ՍԷՎ-ի վարչութիւնը։ Հանդիպման ներկայ էր նաեւ Պատրիարքական փոխանորդ Տ. Գրիգոր Ա. Քհնյ. Տամատեան։
Զուիցերիոյ հայոց թեմի առաջնորդական տեղապահ Տ. Գուսան Վրդ. Ալճալեան, որ ներկայիս կ՚այցելէ քաղաքս, նախընթաց օր Գումգաբուի մէջ ընդունուեցաւ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանի կողմէ։ Ան Ամեն. Ս. Պատրիարք Հայրը շնորհաւորեց եւ ուրախութիւն յայտնեց, որ Պոլսոյ Աթոռը տիրացած է իր նոր գահակալին։
