Թրքահայ կեանք

ԳԱՏԸԳԻՒՂԻ ԹԱՂԱՅԻՆ ԽՈՐՀՈՒՐԴԻՆ ԱՐԴԱՐ ՀՊԱՐՏՈՒԹԻՒՆԸ

Գատըգիւղի Ս. Թագաւոր եկեղեցւոյ թաղային խորհուրդը այս շրջանին կ՚ապրի արդար հպարտութիւն մը։ Արդարեւ, թաղի Արամեան-Ունճեան վարժարանի նոր համալիրը երկինք խոյացած է երկար տարիներու հետեւողական աշխատանքով։

ԱՄԵՆ. Ս. ՊԱՏՐԻԱՐՔ ՀԱՅՐԸ ԸՆԴՈՒՆԵՑ ՄԽԻԹԱՐԵԱՆԻ ԸՆՏԱՆԻՔԻ ՎԱՐԻՉՆԵՐԸ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ հիւրընկալեց Մխիթարեան միաբանութեան Իսթանպուլի վանատունէն Հ. Յակովբոս Ծայրագոյն Վարդապետ Չօփուրեանն ու մատակարար մարմնի ատենապետ Ռաֆայէլ Ալիքը, որոնց կ՚ընկերանար սանուց միութեան վարչութեան ատենապետ Արսէն Գովան։

ԱՍՈՒԼԻՍ. «ԹՈՒԱՆՇԱՅՆԱՑՈՒՄ» ԵՒ ԱՐԵՒՄՏԱՀԱՅԵՐԷՆ

ԺԱՄԱՆԱԿ օրաթերթի ընտանիքի հրաւէրով այս օրերուն քաղաքս կը գտնուի Երեւանէն՝ «www.digilib.am»ի թեքնիք տնօրէն Յովհաննէս Կիզողեան, որու հետ երէկ երեկոյեան ասուլիս մը տեղի ունեցաւ Պէյօղլուի Ս. Երրորդութիւն եկեղեւոյ համալիրէն ներս։ Թաղի քարոզիչ Տ. Յարութիւն Վրդ. Տամատեանի ջանքերով կազմակերպուած էր այս մտերմիկ հաւաքոյթը, որուն ներկայ գտնուեցան նաեւ Պատրիարքական փոխանորդ Տ. Գրիգոր Աւ. Քհնյ. Տամատեան եւ Կրօնական ժողովի ատենադպիր Տ. Կորիւն Աւ. Քհնյ. Ֆէնէրճեան։

ԶՕՐԱԿՑՈՒԹԵԱՆ ԿՈՉ

Երէկ, հաճոյքն ունեցանք խմբագրատանս մէջ ընդունելու Կէտիկփաշայի «Հրանդ Տինք» դպրոցի կամաւոր հոգաբարձու Դալար եւ Արթօ Հորոզօղլու ամոլը։ Այս շաբաթավերջին նախատեսուած է այս վարժարանին ի նպաստ տարեկան հանգանակութիւնը, որու ընդառաջ Հորոզօղլուները խմբագրատունս այցելեցին՝ ըստ ընկալեալ սովորութեան։