Ամերիկայի Միացեալ Նահանգներու նախագահ Ճօ Պայտըն եւ Ռուսաստանի նախագահ Վլատիմիր Փութին երէկ ունեցան տեսաժողով մը։ Հեռավար դրութեամբ, տեսակապի միջոցաւ զրուցեցին երկու ղեկավարները, որոնց շփումին կը սպասուէր երկար ժամանակէ ի վեր՝ մանաւանդ Ուաշինկթըն-Մոսկուա առանցքին վրայ կուտակուած խնդիրներուն բերումով։
Մինչ Գերմանիոյ վարչապետ Անկելա Մերքել այլեւս հրաժեշտ կու տայ քաղաքական ասպարէզին, երկրէն ներս գործի գլուխ կու գայ նոր իշխանութիւն մը։ Այսպէս, յառաջիկայ շրջանին Գերմանիոյ ղեկը պիտի ստանձնէ համախոհական կառավարութիւն մը, որ պիտի բաղկանայ սոցիալ-դեմոկրատներէն, կանաչներէն եւ ազատ ժողովրդավարականներէն։
Երեւանի մէջ վերջին օրերուն տեղի ունեցաւ «Հայաստան-Արցախ-սփիւռք» համահայկական 12-րդ մրցանակաբաշխութիւնը։ Այսպէս, Սփիւռքի լաւագոյն խմբագրի անուանակարգին մէջ այս տարի մրցանակի արժանացաւ Պէյրութի «Զարթօնք» օրաթերթի գլխաւոր խմբագիր Սեւակ Յակոբեան։
Հայաստանի Պետական բժշկական համալսարանի վերատեսուչ Արմէն Մուրատեան երէկ Փարիզի մէջ ներկայացուց վիրաւոր զինուորներու վերականգնման ուղղութեամբ տարուած աշխատանքները։ Իր հետ էր նաեւ Հայկուհի Մինասեան, որ 44-օրեայ պատերազմի ժամանակ կը գտնուէր Ստեփանակերտի Ծննդատան մէջ՝ Ատրպէյճանի բանակին կողմէ թիրախաւորման պահուն։
Ամերիկայի Միացեալ Նահանգներու մէջ վերջին օրերուն մահացած է նախկին ծերակուտական Ռապըրթ Տոլ, ինչ որ լայն արձագանգ գտած է՝ մանաւանդ սփիւռքի շրջանակներէն ներս։ Միացեալ Նահանգներու օրէնսդիր մարմինէն ներս ան եղած էր իր պաշտօնավարած շրջանի յայտնի դէմքերէն մին։
ՍԱԳՕ ԱՐԵԱՆ
Հայաստանի մէջ շաբաթավերջին տեղի ունեցան տեղական ինքնակառավարման մարմիններու (ՏԻՄ) ընտրութիւններ, որոնց արդիւնքը նոր հարուած մը կը համարուի վարչապետ Նիկոլ Փաշինեանի դէմ։ 20 յունիսէն ետք Վանաձորի մէջ իր «Քաղաքացիական պայմանագիր» կուսակցութեան ձայները նուազած են 18 հազարով, Աբովեանի ու Վեդիի մէջ՝ գրեթէ կրկնակի․ խոշոր քաղաքներու ամփոփ տուեալները։
Ատրպէյճանի նախագահ Իլհամ Ալիեւ Պաքուի մէջ հիւրընկալեց՝ փրոֆ. Ազիզ Սանճարը, որ Նոպելի տարրաբանութեան մրցանակը նուաճած է։ Թուրք գիտնականը վերջին օրերուն կը գտնուի Ատրպէյճանի մէջ։
Թուրքիա-Քաթար Բարձրագոյն ռազմավարական խորհուրդի 7-րդ ժողովը կը գումարուի Տոհայի մէջ:
Բանակցութիւններու ընթացքին օրակարգի վրայ կու գան՝ տարածաշրջանային եւ միջազգային առաջնահերթ բնոյթով հարցեր:
Ռուսաստանի նախագահ Վլատիմիր Փութին երէկ Նիւ Տելհիի մէջ հանդիպում մը ունեցաւ Հնդկաստանի վարչապետ Նարենտրա Մոտիի հետ։ 2019 թուականէն ի վեր սա երկու ղեկավարներու առաջին անձնական շփումն էր։
Հայաստանի մէջ այս շրջանին կը սկզբնաւորուի բացառիկ գործընկերային նախագիծ մը, որ կը կոչուի «Մատենա»։ Սա առաջնորդութեան ու մասնագիտական զարգացման միջազգային դպրոց մըն է, որու առաքելութիւնն է գիտելիքի կուտակման եւ համաշխարհային փորձառութեան տարածման միջոցաւ նպաստել մասնագիտական հմտութիւններու եւ ղեկավարման կարողութիւններու զարգացման՝ բոլոր անոնց համար, որոնք իրենց մասնագիտական ոլորտներէ ներս կը ձգտին կատարելագործման եւ գերազանցութեան։
