Թուրքիա-Հայաստան յարաբերութիւններու բնականոնացման օրակարգով Արտաքին գործոց նախարար Մեւլիւտ Չավուշօղլու երէկ հանդէս եկաւ հերթական յայտարարութիւններով։ «Հայաստանի հետ մեր սկսած եւ Ատրպէյճանի կողմէ աջակցութիւն գտած կարգաւորման գործընթացը կը շարունակուի՝ վստահութեան բարձրացման ուղղեալ քայլերով։
Հայաստանի վարչապետ Նիկոլ Փաշինեան երէկ հաստատեց՝ երկրէն ներս նախատեսուած սահմանադրական փոփոխութիւնները իրականացնելիք բարեփոխումներու խորհուրդի կազմն ու գործունէութեան կարգը։ Պաշտօնական աղբիւրներու հաղորդումներով, Սահմանադրական բարեփոխումներու խորհուրդը կը գլխաւորէ Արդարադատութեան նախարար Կարէն Անդրէասեան։
Ռուսահայ յայտնի գործարար եւ բարերար Սամուէլ Կարապետեան կը շարունակէ միջազգային լրատուամիջոցներու ուշադրութեան արժանանալ՝ իր յաջողութիւններով եւ ձեռքբերումներով։ «Forbes»ի կողմէ Ռուսաստանի կալուածոց շուկայի յառաջատարներուն վերաբերեալ 2021 թուականի համար պատրաստուած ցուցակին մէջ ընդգրկուած է Սամուէլ Կարապետեանի անունը։
Ռուսաստանի Արտաքին գործոց նախարարութեան բանբերի տեղակալ Ալեքսէյ Զայցեւ շաբաթական մամլոյ ասուլիսի ընթացքին անդրադարձաւ Հայաստան-Ատրպէյճան սահմանի յստակեցման հարցով յանձնաժողովի ստեղծման նիւթին։
Դերասանուհի եւ Շիշլիի նախկին քաղաքապետ Ֆ. Կիրիք յուղարկաւորուեցաւ յուզումնախառն մթնոլորտով:
Քաղաքապետարանի առջեւ եւ CRR-ի մէջ տեղի ունեցած սգահանդէսներէն վերջ, աղօթք կատարուեցաւ Թէշվիքիյէի մզկիթի համալիրէն ներս, ուր ներկայ էին նաեւ Մշակոյթի եւ զբօսաշրջութեան նախարար Էրսոյ եւ Իսթանպուլի կուսակալ Երլիքայա:
Ամերիկայի հայ աւետարանչական ընկերակցութիւնը ողջունեց Քամփ Արմէնի վերակառուցման ծրագիրը:
Հրապարակուած յայտարարութեան մէջ կառոյցը պատրաստակամութիւն յայտնած է շինարարութեան աջակցելու ուղղութեամբ:
Հայաստանեայց Առաքելական Եկեղեցւոյ Հիւսիսային Ամերիկայի Արեւմտեան թեմէն ներս լոյս տեսաւ ժողովածոյ մը, որ կողքի մը տակ կը համախմբէ Պատրիարքական Աթոռի երանաշնորհ գահակալներէն հոգելոյս Տ. Գարեգին Արք. Խաչատուրեանի «Հովիւի խօսքեր»ը։ Թեմը այս տարի կը նշէ իր հիմնադրութեան 95-ամեակը եւ այս յոբելեանի ծիրէն ներս լոյս ընծայուած է սոյն հատորին՝ որպէս 5-րդ օղակը «Ոսկեղնիկ» մատենաշարի։
Հայաստանի Արդարադատութեան նախարար Կարէն Անդրէասեան երէկ Երեւանի մէջ հիւրընկալեց Վրաստանի Արդարադատութեան նախարար Ռաթի Պրեկածէի կողմէ գլխաւորուած պատուիրակութիւն մը։ «Արմէնփրէս»ի հաղորդումներով, բանակցութիւններու ընթացքին նախարարները քննարկումներ ծաւալեցին իրենց ոլորտէն ներս համագործակցութեան օրակարգային հարցերուն շուրջ։
Հայաստանի Արտաքին գործոց նախարար Արարատ Միրզոյեան շփումներ ունեցաւ Լիւքսեմպուրկի մէջ։ Բացի իր պաշտօնակից Ժան Ասելպորնի հետ բանակցութիւններ վարելէ, Արարատ Միրզոյեան ընդունուեցաւ նաեւ Լիւքսեմպուրկի վարչապետ Սավիէ Պեթելի կողմէ։
Երեւանէն երէկ տեղեկացուեցաւ, որ Հայաստանի վարչապետ Նիկոլ Փաշինեան վարակուած է քորոնաժահրով։ Ըստ պաշտօնական աղբիւրներու, ան անմիջապէս մեկուսացած է եւ այս շրջանին պիտի աշխատի հեռավար դրութեամբ։
