Թրքահայ կեանք

Երէկ, Պատրիարքական ընդհանուր փոխանորդ Տ. Արամ Արք. Աթէշեան շնորհաւորական այցելութիւն մը տուաւ Իսթանպուլի նորանշանակ կուսակալ Ալի Երլիքայային։ Այս առթիւ նորանշանակ կուսակալը ջերմ մթնոլորտի մը մէջ հիւրընկալեց ընդհանուր փոխանորդը։

Յայտնի համայնքային բարերար եւ Գարակէօզեան Տան խնամակալութեան ատենապետ Տիգրան Կիւլմէզկիլ մեծարուեցաւ Պոմոնթիի Մխիթարեան վարժարանին մէջ։ Կաթողիկէ հայոց վիճակաւոր Տ. Լեւոն Արք. Զեքիեանի ձեռամբ Տիգրան Կիւլմէզկիլին յանձնուեցաւ յուշատախտակ մը

Սկիւտարի սանուց միութեան մէջ շաբաթավերջին տեղի ունեցաւ Միջվարժարանային ընթերցման խրախճանքը, որ վերջին տարիներուն դարձած է աւանդական։ Մեր զանազան վարժարաններէն աշակերտական խումբեր մասնակցեցան այս խրախճանքին՝ ուսուցիչներուն գլխաւորութեամբ։

Կէտիկփաշայի Ս. Յովհաննէս եկեղեցւոյ Զուարթնոց դպրաց դաս-երգչախումբը անցեալ շաբաթավերջին այցելեց Ս. Թագաւոր եկեղեցի, ուր մասնակցեցաւ կիրակնօրեայ արարողութեանց։ Ս. Պատարագը մատոյց՝ Ս. Թագաւոր եկեղեցւոյ քարոզիչ Տ. Յարութիւն Աբեղայ Տամատեան։

Պատրիարքական ընդհանուր փոխանորդ Տ. Արամ Արք. Աթէշեան շաբաթավերջին հիւրընկալեց Եշիլգիւղի Ս. Ստեփանոս եկեղեցւոյ թաղային խորհուրդի ատենապետ Հապիպ Էօզֆուրունճուն եւ իր գործակից ընկերները։ Ներկայ էր նաեւ Եշիլգիւղի հոգեւոր հովիւ Տ. Կորիւն Ա. Քհնյ. Ֆէնէրճեան։

Երէկ երեկոյեան, Ֆէրիգիւղի «Շիրինօղլու» սրահին մէջ տեղի ունեցաւ «Հայճար»ի Ամանորի հաւաքոյթը։ «Հայճար»ի ընտանիքը տարեմուտի առթիւ փափաքած էր ընդունելութիւնով մը համախմբել իր համակիրներու եւ գործակիցներու շրջանակը:

Հարպիյէի «Հիլթըն» պանդոկի համալիրէն ներս այս շաբաթավերջին տեղի կ՚ունենայ Istanbul Art Show-ը, որ գեղարուեստական մեծ ձեռնարկ մըն է։ Վիթխարի ցուցահանդէսի մը ձեւաչափին մէջ համախմբուած են կերպարուեստի բազում վարպետներ։

Մխիթարեան վարժարանէն ներս երէկ տեղի ունեցաւ Ամանորի առթիւ կազմակերպուած աւանդական քէրմէսը, որ առիթ հանդիսացաւ մեծ ոգեւորութեան։ Ծնողաց միութեան ջանքերով կազմակերպուած էր քէրմէսը, որու բացումին ներկայ գտնուեցան Մխիթարեան միաբանութեան Իսթանպուլի վանատունէն Հայր Յակովբոս Ծ. Վրդ. Չօփուրեան, դպրոցի լիսէի բաժնի տնօրէնուհի Եւա Օրաքեան եւ նախակրթարանի բաժնի տնօրէնուհի Քաթիա Վարկը։

Ամանորի եւ Ս. Ծննդեան ընդառաջ Գատըգիւղի Ս. Թագաւոր եկեղեցիէն ներս ստեղծուած է տօնական մթնոլորտ։ Վերջին օրերուն զարդարուեցաւ նաեւ գատըգիւղցիներու տօնածառը, որ տեղադրուած է թաղի Ս. Թագաւոր եկեղեցւոյ գաւիթին մէջ։

Թոփգաբուի Լեւոն-Վարդուհեան վարժարանի աշակերտները վերջին շրջանին իրականացուցին շարք մը պտոյտներ, որոնք թէ՛ խանդավառութեան առիթ հանդիսացան տղոց տեսակէտէ եւ թէ նպաստեցին անոնց ընդհանուր գիտելիքներու զարգացման։