Թրքահայ կեանք

Թոփգաբուի Լեւոն-Վարդուհեան վարժարանին մէջ ներկայ Ամանորի շրջանը բնորոշուեցաւ մեծ խանդավառութեամբ։ Դպրոցէն ներս նախընթաց օր տեղի ունեցաւ հանդէս մը, որու ընթացքին տղաքը ողջունեցին Կաղանդ պապուկը։

 Գալֆաեան Տան ընտանիքը Նոր տարւոյ եւ Սուրբ Ծննդեան առթիւ ապրեցաւ մեծ ուրախութիւն։ Վերջին օրերուն զանազան ձեռնարկներ տեղի ունեցան դպրոցին մէջ։

Սուրբ Փրկիչ Ազգային հիւանդանոցի մէջ երէկ երեկոյեան տեղի ունեցաւ Ամանորի աւանդական տօնակատարութիւնը։ Այս առթիւ «Պիլէք» հանգստարանի սրահին մէջ համախմբուեցան հոգաբարձութեան անդամները, բժշկապետը, հաստատութեան յարակից յանձնախումբերու անդամները, բժշկական կազմը, մասնագիտական անձնակազմը, մնայուն բնակիչներն ու պաշտօնէութիւնը։

Պատրիարքական ընդհանուր փոխանորդ Տ. Արամ Արք. Աթէշեան վերջին օրերուն Գումգաբուի մէջ հիւրընկալեց Պատրիարքարանի Երիտասարդաց յանձնախումբի անդամները, որոնք շնորհաւորութիւններ յղեցին Նոր տարւոյ եւ Ս. Ծննդեան առթիւ։ Հանդիպման ներկայ էր նաեւ Տ. Մաղաքիա Աբեղայ Պեսքիսիզեան։

Թոփգաբուի Լեւոն-Վարդուհեան վարժարանի աշակերտները Ամանորի եւ Ս. Ծննդեան տօնին ընդառաջ երէկ անցուցին հաճելի օր մը։ Տղաքը հաւաքաբար այցելեցին «Աքուափարք», Ֆլորիա։

Գատըգիւղի Ս. Թագաւոր եկեղեցւոյ մէջ կազմակերպուած Աւետարանական սերտողութիւններու մասնակիցներն ու թաղի յարակից մարմիններու անդամները նախընթաց օր համախմբուեցան Նոր տարուան առթիւ։ Այս առթիւ մատուցուեցաւ գոհաբանական Ս. Պատարագ մը՝ ձեռամբ Տ. Յարութիւն Աբեղայ Տամատեանի, որ խօսեցաւ նաեւ քարոզ մը։

Սուրբ Ստեփանոսի վերյիշման առթիւ տարեկան անուան տօնախմբութիւն եւ վարժարանի ի նպաստ աւանդական սիրոյ սեղան Եշիլգիւղի եկեղեցւոյ մէջ:
Պատրիարքական ընդհանուր փոխանորդ Տ. Արամ Արք. Աթէշեան նախագահեց արարողութիւններուն: Աշակերտները ծափահարութիւններու արժանացան իրենց ելոյթներով:

Գատըգիւղի Ս. Թագաւոր եկեղեցւոյ մէջ երէկուան արարողութիւններուն նախագահեց Կրօնական ժողովի ատենապետ Տ. Սահակ Եպսկ. Մաշալեան, որ տուաւ նաեւ օրուան պատգամը։ Ս. Պատարագը մատոյց Տ. Գրիգոր Ա. Քհնյ. Տամատեան։

Երէկ, հաճոյքն ունեցանք խմբագրատանս մէջ հիւրընկալելու նախկին պոլսահայ Տ. Եզնիկ Քհնյ. Կիւզէլեանը, որ երկար տասնամեակներէ ի վեր կը պաշտօնավարէ Պրազիլիոյ մէջ։ Սփիւռքի մէջ պաշտօնավարող նախկին պոլսահայ հոգեւորականներու շարքին ամենայայտնիներէն եւ ամենահամակրելիներէն մին է տէր հայրը։

Շաբաթավերջին Եշիլգիւղի Ս. Ստեփանոս եկեղեցւոյ մէջ տեղի պիտի ունենայ տարեկան անուան տօնախմբութիւն, որուն պիտի յաջորդէ թաղի վարժարանին ի նպաստ տարեկան աւանդական հանգանակութիւնը։ Նախընթաց օր հաճոյքն ունեցանք Եշիլգիւղի թաղային խորհուրդի ատենապետ Հապիպ Էօզֆուրունճուն եւ թաղի աշխոյժ ազգայիններէն Յովնան Տուրսունը ընդունելու խմբագրատանս մէջ։