Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց մեներգչուհի Մարալ Այվազը, որ յառաջիկայ շաբթուան մէջ հանդէս պիտի գայ համերգով մը։ Իրեն ընկերացան սոյն համերգի կարգադիր յանձնախումբէն ներկայացուցիչներ։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Էյուպի Ս. Աստուածածին եկեղեցւոյ թաղային խորհուրդի ատենապետ Սայաթ Մուրատօղլուն եւ գործակից ընկերները։ Հանդիպման ներկայ էր նաեւ հոգեւոր հովիւ Տ. Ներսէս Քհնյ. Այվազեան։
Գալֆաեան տան խնամակալութիւնը երէկ ընկերային ցանցերու վրայ ամփոփ լուսաբանութիւնով մը հանդէս եկաւ՝ դպրոցի ապագային վերաբերեալ շրջանառութեան մէջ մտած լուրերուն մասին։ Երէկ արձագանգ հանդիսացած էինք, որ Հոգեգալստեան տօնին ժամանակ Պէյօղլուի սուրբ եկեղեցեաց թաղային խորհուրդի ատենապետ Աքսէլ Թոփալեան յայտնած էր, որ յառաջիկայ տարի դպրոցը պիտի վերածուի մանկապարտէզի եւ աշակերտները պիտի ուղարկուին Գատըգիւղի Արամեան-Ունճեան վարժարանը։
Գատըգիւղի Արամեան-Ունճեան վարժարանին մէջ այս տարուան աւանդական երաժշտական փառատօնը առիթ հանդիսացաւ, որպէսզի տղաքը տարրական ճանաչում ունենան անմոռանալի հանճար Արամ Խաչատուրեանի մասին, որու ծննդեան 120-ամեայ յոբելեանը նշուած էր մօտաւոր անցեալին։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց յայտնի պղնձագործ Գարեգին Քայա Քալայճըն, որ Գումգաբու փութացած էր նուիրելու համար իր գիրքերը։ Ան համբաւ ձեռք բերած է իր վարպետութեամբ եւ այդ հիման վրայ հրատարակուած են երկու գիրքեր, որոնք իր արհեստն ու արուեստը խոշորացոյցի տակ կը բերեն։
Երէկ հաճոյքն ունեցանք խմբագրատանս մէջ հիւրընկալելու Գալֆաեան տան խնամակալութենէն Վիլմա Քարան եւ Թոփգաբուի Ս. Նիկողայոս եկեղեցւոյ թաղային խորհուրդի անդամներէն Նատին Վանլըօղլու-Թաշը։
Լուսաւորիչ երգչախումբի մանկապատանեկան կազմը երէկ երեկոյեան խանդավառ համերգով մը հանդէս եկաւ Շիշլիի «Ճեմիլ Ճանտաշ-Քենթ» սրահին մէջ։ Երեկոյթը ձօնուած էր Լուսաւորիչ դպրաց դաս-երգչախումբի հիմնադրութեան 95-ամեակի յոբելեանին։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Իսթանպուլի մօտ Շուէտի աւագ հիւպատոս Ճոհաննա Սթրէօմքուիստը, որուն կ՚ընկերանար քաղաքիս Շուէտական հետազօտական կաճառի վարիչ Օլոֆ Հելլօ։
Պէյօղլուի սուրբ եկեղեցեաց թաղային խորհուրդը կ՚ընթանայ բազմակողմանի նախաձեռնութիւններով:
Ատենապետ Աքսէլ Թոփալեան տեղեկացուց, որ բաւական հասունցած է Թոքաթլեան խանի արժեւորման ծրագիրը:
Պաքըրգիւղի ընտանիքը խանդավառ շաբաթավերջ մը ապրեցաւ՝ Տատեան վարժարանի շրջանաւարտից օրուան առթիւ։ Տարեկան աւանդական հաւաքը հերթական անգամ համախմբեց դպրոցի զանազան սերունդներէ սաները, որոնք թէ՛ զիրար վերագտնելու ուրախութիւնը ապրեցան եւ թէ ականատեսը դարձան իրենց հասած հաստատութեան ներկայ վիճակին։
