Թրքահայ կեանք

Ֆէրիգիւղի «Շիրինօղլու» սրահին մէջ երէկ երեկոյեան տեղի ունեցաւ յատկանշական ձեռնարկ մը, որ համախմբեց բազմաթիւ մշակութասէրներ եւ ընթերցասէրներ։ Թրքահայ ազգային-եկեղեցական կեանքի արդի պայմաններուն տեսակէտէ փայլուն երեկոյթ մըն էր այս մէկը, որու ընթացքին սրահին մէջ ստեղծուեցաւ բարձր տրամադրութիւն եւ կարծիքի փոխանակումներու աշխոյժ մթնոլորտ։

Անթալիոյ մէջ, շաբաթավերջին, Ս. Ալյիփոս Սթիլիթիս յունաց եկեղեցւոյ մէջ մատուցուեցաւ հայածէս Ս. Պատարագ՝ ձեռամբ գաւառի հայ համայնքներու տեսուչ Տ. Աւետիս Քհնյ. Թապաշեանի։ Արարողութեան ընթացքին տէր հայրը խօսեցաւ քարոզ մը, որու ընթացքին Ամեն. Ս. Պատրիարք Հօր օրհնութիւնն ու հայրական ողջոյնները փոխանցեց արարողութեան մասնակից հաւատացեալներուն։

Երէկ երեկոյեան, Սուրբ Փրկիչ Ազգային հիւանդանոցի «Կոմիտաս» սրահին մէջ տեղի ունեցաւ Թրքահայ վաքըֆներու միութեան (ԹՎՄ-ERVAB) հերթական ժողովը։ Թէեւ այս մէկը, ըստ էութեան, ատենապետները համախմբող հարթակ մըն է, սակայն, երէկուան ժողովէն բազմաթիւ ատենապետներ բացակայեցան եւ անոնց գլխաւորած խորհուրդները ներկայացուեցան այլ անդամներու կողմէ։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Հայաստանի Ճարտարապետներու միութեան նախագահ Աշոտ Գրիգորեանը, որ «Հայճար»ի կողմէ հրաւիրուած է քաղաքս։ Հանդիպման ներկայ էր նաեւ «Հայճար»ի սիւներէն Նազար Պինաթլը։

Պաքըրգիւղի Տատեան վարժարանի «Տիգրան Կիւլմէզկիլ» սրահի երդիքին տակ շաբաթավերջին տեղի ունեցաւ «Եաման» երիտասարդ երաժիշտներու խումբին համերգը, որ մեծ ոգեւորութեան առիթ հանդիսացաւ։

Խոր ցաւով վերահասու եղանք, թէ երէկ իր մահկանացուն կնքած է յայտնի լուսանկարիչ Մանուէլ Չըթաք։ Իր յանկարծական մահը ցնցում պատճառած է բոլոր սիրելիներուն՝ քանի ան իսկապէս անժամանակ հրաժեշտ առած է կեանքէն։

2023-2024 շրջանի առաջին սիրոյ սեղանի հանգանակութեան հասոյթը ակնկալուածէն շատ աւելի բարձր մակարդակի հասաւ:
Ամեն. Ս. Պատրիարք Հայրը Սամաթիոյ մէջ ստեղծուած լաւատեսութեան պայմաններով խօսեցաւ համայնքային վարժարաններու ապագային մասին:

«Հայճար»ի նախաձեռնութեամբ այս շաբաթավերջին հերթական անգամ վերյիշուեցան արքունի ճարտարապետներ Պալեան գերդաստանի բարեյիշատակ անդամները, որոնց համար հոգեհանգստեան պաշտօն տեղի ունեցաւ Սկիւտարի գերեզմանատան Ս. Խաչ թաղամասին մէջ։ Ծանօթ է, որ Սկիւտարի գերեզմանատունէն ներս Պալեաններուն համար «Հայճար»ի ջանքերով Պալեաններու շիրիմը յուշարձանի մը վերածուած է եւ ըստ ձեւաւորուած նախընթացին՝ ամէն տարի հոկտեմբերի առաջին շաբաթավերջին անոնք կ՚ոգեկոչուին մասնաւոր հոգեհանգստեան պաշտօնով։

Շիշլի մարզակումբի զանազան կազմերը նոր եղանակի բացման փուլին կ՚արձանագրեն փայլուն յաջողութիւններ։ Պասքեթպոլի, վոլէյպոլի, փինկ-փոնկի, թենիսի, մարմնամարզի եւ ճատրակի մէջ շիշլիցիներուն ապահոված արդիւնքները յուսադրիչ են։

Գոհունակութեամբ վերահասու կ՚ըլլանք, թէ «Արաս» հրատարակչութիւնը ընթերցասէրներու տրամադրութեան տակ դրած է նոր ու հետաքրքրական գիրք մը, որ կը կոչուի «Dersaadet»։ Միքայէլ Աստերիսի հեղինակած այս գործը գերմաներէնէ թրքերէնի թարգմանուած է Զէյնեփ Թաշքընի կողմէ։