Լրահոս

Եւրոմիութիւնը մտադիր է յառաջիկային կրկնապատկել Ատրպէյճանէն կազի մատակարարումները:
Ուրսուլա ֆոն տէր Լէյէն եւ Իլհամ Ալիեւ երէկ Պաքուի մէջ հանդիսաւորապէս ստորագրեցին կարեւոր պայմանագիր մը:

Հայաստանի վարչապետ Նիկոլ Փաշինեան երէկ հեռախօսազրոյց մը ունեցաւ Ռուսաստանի վարչապետ Միխայիլ Միշուսթինի հետ։ Պաշտօնական աղբիւրներու հաղորդումներով, երկու վարչապետները քննարկեցին Հայաստան-Ռուսաստան համագործակցութեան, ինչպէս նաեւ Եւրոասիոյ տնտեսական միութեան (ԵԱՏՄ) օրակարգին վերաբերեալ հարցեր։

Հայաստանի Արտաքին գործոց նախարար Արարատ Միրզոյեան այսօր պաշտօնական այցելութիւն մը կու տայ Վարշաւիա, ուր կը հիւրընկալուի Լեհաստանի Արտաքին գործոց նախարար Զպիկնիեւ Ռաուի կողմէ։ Այցելութեան ընթացքին նախարարը  հանդիպումներ կ՚ունենայ նաեւ երկրի ղեկավարութենէն այլ յառաջատար դէմքերու հետ։

Երեւանի «Հայաստանի Հանրապետութիւն» օրաթերթը այսօր հարցազրոյց մը հրատարակած է Արաբական ծոցի երկիրներու Աստուածաշունչի ընկերութեան ընդհանուր քարտուղար վերապատուելի Հրայր Ճէպէճեանի հետ։ Այս առթիւ ան կոչ ուղղած է, որպէսզի բոլորը ապաւինին հայութեան համահաւաք ներուժին։

Հայաստանի եւ Ատրպէյճանի արտաքին գործոց նախարարները հանդիպում մը ունեցան Թիֆլիզի մէջ:
Արարատ Միրզոյեան եւ Ճէյհուն Պայրամով ընդունուեցան նաեւ Վրաստանի վարչապետ Իրակլի Ղարիպաշվիլիի կողմէ:
Երեւան եւ Պաքու թէեւ միշտ հակադիր մօտեցումներ կ՚արտայայտեն, սակայն, կ՚ընդգծեն նաեւ իրենց խաղաղութեան ձգտումները:

Գոհունակութեամբ վերահասու կ՚ըլլանք, թէ մեր նոր սերունդի արժէքաւոր ներկայացուցիչներէն Արփի Սարուխանեան փայլուն յաջողութեամբ աւարտած է Անգլիոյ Exeter-ի համալսարանը։ Ան վկայուած է այդ հեղինակաւոր համալսարանի ֆիզիքի եւ ասթրօֆիզիքի բաժնէն։

Երեւանի մէջ, երէկ երեկոյեան եզրափակուեցաւ «Ոսկէ ծիրան» շարժանկարի փառատօնը, որ այս տարի կազմակերպուեցաւ 19-րդ անգամ։ Յուլիսի 10-ին սկիզբ առած փառատօնի ծրագրի աւարտը բնորոշեց երէկուան մրցանակաբաշխման արարողութիւնը, որ տեղի ունեցաւ Օփերայի համալիրէն ներս։

Հայաստանի Արտաքին գործոց նախարար Արարատ Միրզոյեան այսօր Թիֆլիզի մէջ հանդիպում մը կ՚ունենայ Ատրպէյճանի Արտաքին գործոց նախարար Ճէյհուն Պայրամովի հետ։ 44-օրեայ պատերազմին յաջորդած իրավիճակին մէջ Երեւանի եւ Պաքուի միջեւ համապարփակ խաղաղութեան պայմանագրի մը մշակումը օրակարգը առաջնահերթօրէն կը զբաղեցնէ, Հայաստան-Ատրպէյճան սահմանազատումով ու սահմանագծումով, նաեւ Հարաւային Կովկասի հաղորդակցութիւններու ապաշրջափակումով հանդերձ։

Խասգիւղի հրէից գերեզմանատան դէմ երէկ մտահոգիչ յարձակում մը գործուեցաւ։ Դէպքին հետեւանքով պատմական գերեզմանատունէն ներս 81 շիրիմ կոտրուեցաւ։

15 յուլիսի Ժողովրդավարութեան եւ ազգային միասնականութեան օրուան առթիւ երէկ յիշատակութիւններ տեղի ունեցան բովանդակ Թուրքիոյ մէջ։ Ձախող պետական հարուածի 6-րդ տարելիցին ոգեկոչուեցան նահատակները։ Հանրապետութեան նախագահ Ռեճեփ Թայյիպ Էրտողան Իսթանպուլի մէջ մասնակցեցաւ մեծ հանրահաւաքի մը, որ կազմակերպուած էր Սարաչհանէի հրապարակին վրայ։