Պատրիարքական Ընդհանուր Փոխանորդ Տ. Արամ Ս. Արք. Աթէշեան Ամենապատիւ Սրբազան Պատրիարքին վախճանման կապակցութեամբ հեռաձայնով կապ հաստատեց Մայր Աթոռ Սուրբ Էջմիածնի հետ։ Նորին Սրբազնութիւնը Ամենայն Հայոց Տ.Տ. Գարեգին Բ. Կաթողիսկոսին խոր ցաւով տեղեկացուց, որ Թուրքիոյ Հայոց Պատրիարք Ամենապատիւ Տ. Մեսրոպ Ս. Արք. Մութաֆեան այսօր կէսօրուան ժամերուն վախճանած է Սուրբ Փրկիչ Ազգային հիւանդանոցի մէջ, ուր կը գտնուէր վերջին տարիներուն։
Երէկ երեկոյեան ամերիկահայ յայտնի երգիծաբան Վահէ Պէրպէրեան ելոյթ մը ունեցաւ քաղաքիս մէջ։ Շիշլիի քաղաքապետութեան «Քենթ» մշակոյթի կեդրոնին մէջ տեղի ունեցաւ Վահէ Պէրպէրեանի զուարճախօսութիւնը։
Բանկալթիի Մխիթարեան վարժարանի լիկէոնի բաժինը 25-28 փետրուար 2019 թուականերու միջեւ, օգտուելով նաեւ Բարեկենդանի արձակուրդէն, կատարեց քառօրեայ պտոյտ մը դէպի Վենետիկ: Աւելի քան վաթսուն մխիթարեանցի աշակերտներէ բաղկացեալ խումբը կը գլխաւորէր տնօրէնուհի Եւա Օրագեան: Աշակերտներուն կ՚ընկերակցէր նաեւ չորս ուսուցիչ:
Նկարիչ Սամուէլ Լաճիկեան վաղը իր առաջին ցուցահանդէսը պիտի բանայ քաղաքիս մէջ՝ 8 մարտի առթիւ:
Յայտնի արուեստագէտը 22 տարի ԱՄՆ-ի մէջ ապրելէ վերջ վերադարձած է Հայաստան, ուր կը շարունակէ ստեղծագործել:
Համաշխարհային կանանց օրուան՝ մարտի 8-ի սեմին Պէզճեան Մայր վարժարանին մէջ տեղի ունեցաւ ասուլիս մը։ Որպէս ատենախօս ընտրուած էին Մայր վարժարանէ շրջանաւարտ հինգ կանայք, որոնք յաջողութեան հասած են իրենց ասպարէզին մէջ։
Գատըգիւղի Ս. Թագաւոր եկեղեցւոյ մէջ նախընթաց օր Մեծ պահքը միասնաբար ողջունեցին՝ սուրբգրային սերտողութիւններու մասնակիցները։ Եկեղեցւոյ յարակից «Պալըքճեան» սրահին մէջ այս առթիւ կազմակերպուեցաւ հաւաքոյթ մը՝ գլխաւորութեամբ Տ. Յարութիւն Աբեղայ Տամատեանի եւ մասնակցութեամբ Տ. Գրիգոր Ա. Քհնյ. Տամատեանի։
Սկիւտարի սանուց միութեան մէջ Բարեկենդանի խրախճանք մը տեղի ունեցաւ Գալֆաեան Տան սաներուն համար։
Պէզճեան Մայր վարժարանի աշակերտները Բարեկենդանի առթիւ այցելեցին «Փելիթ» տուրմի եւ քաղցրաւենիքներու արտադրութեան գործարանը, որու համալիրէն ներս կը գտնուի նաեւ թանգարան մը։ Աշակերտական խումբը գլխաւորեց Պատրիարքական ընդհանուր փոխանորդ Տ. Արամ Արք. Աթէշեան, որու կողքին էր Տ. Մաղաքիա Աբեղայ Պեսքիսիզեան։
Ֆէրիգիւղի ընտանիքը երէկ մեծ խանդավառութեամբ նշեց թաղի Ս. Վարդանանց դպրաց դաս-երգչախումբի կրկնակ տարեդարձները։ Դպրաց դասու հիմնադրութեան 110-րդ եւ երգչախումբի կազմութեան 87-րդ կրկնակ տարեդարձները համընկնեցան Բուն Բարեկենդանին հետ։
Գումգաբուի Պէզճեան սրահին մէջ երէկ Բարեկենդանի առթիւ տեղի ունեցաւ խրախճանք մը, որ կազմակերպուած էր Գարակէօզեան Տան Գնալը կղզիի Կազդուրման կայանի տիկնանց յանձնախումբի նախաձեռնութեամբ։ Բարեկենդանի այս ճաշկերոյթը անցաւ շատ խանդավառ մթնոլորտի մէջ։
