Պատրիարքական տեղապահ Տ. Սահակ Եպսկ. Մաշալեան երէկ Գումգաբուի մէջ հիւրընկալեց Շիշլի մարզակումբի վարչութեան ատենապետ Ալէն Թեքպըչաքը, նախկին ատենապետներէն Հայկարամ Քարասուն եւ վարչայիններէն Զարեհ Քարաքաշը։ Այսպէս, Շիշլի մարզակումբի վարչութեան ներկայացուցիչները նորին սրբազնութեան շնորհաւորութիւններ յղեցին տեղապահի պաշտօնը ստանձնելու բերումով։
Պատրիարքական տեղապահ Տ. Սահակ Եպսկ. Մաշալեան երէկ ընդունեց Սամաթիոյ Ս. Գէորգ եկեղեցւոյ թաղային խորհուրդի ատենապետ Եսայի Տեմիրն ու գործակից ընկերները։ Հանդիպման ընթացքին թաղականները շնորհաւորեցին նորին սրբազնութիւնը՝ տեղապահի պաշտօնի կոչուելուն առթիւ։
Գարակէօզեան Տան Գնալը կղզիի Կազդուրման կայանին մէջ երէկ երեկոյեան տեղի ունեցաւ հետաքրքրական ձեռնարկ մը։ «Գրիգոր Ճամպազեան» խաղավայրէն ներս տեղի ունեցած ձեռնարկը առիթ հանդիսացաւ մեծ խանդավառութեան։
Գոհունակութեամբ վերահասու եղանք, որ մեր համայնքի արժէքաւոր երիտասարդներէն Արթին Տեմիրճի յաջողած է մուտք գործել քաղաքիս գերմանական լիսէն։ 2018-2019 կրթական շրջանի աւարտին ան վկայուած է Սամաթիոյ Սահակեան-Նունեան վարժարանի միջնակարգի բաժնէն։
Ենիգիւղի Գիւտ Տփոյ Ս. Աստուածածին եկեղեցւոյ թաղային խորհուրդի ներկայացուցիչները երէկ այցելեցին Գումգաբու, ուր ընդունուեցան Պատրիարքական տեղապահ Տ. Սահակ Եպսկ. Մաշալեանի կողմէ։ Թաղականներուն հետ էր նաեւ Տ. Զաքէոս Ծ. Վրդ. Օհանեան։
Հայաստանեայց Առաքելական Եկեղեցին երէկ նշեց Տէր Յիսուս Քրիստոսի Պայծառակերպութեան տօնը։ Տաղաւարը առիթ հանդիսացաւ մեծ խանդավառութեան։ Կրօնական արարողութիւններուն առընթեր, մասնաւորապէս երիտասարդները վերակենդանացուցին զիրար թրջելու, իրարու վրայ ջուր սրսկելու աւանդութիւնը։
Պատրիարքական տեղապահ Տ. Սահակ Եպսկ. Մաշալեան շաբաթավերջին Գումգաբուի մէջ հիւրընկալեց Երեւանի «Մխիթար Սեբաստացի» կրթական համալիրէն 13 աշակերտներ, որոնց կ՚ընկերանային նաեւ իրենց ուսուցիչները։ Նորին սրբազնութեան կողքին էր Տ. Զաքէոս Ծ. Վրդ. Օհանեան։ Հիւրերուն ուղեկցեցաւ Պոմոնթիի Մխիթարեան վարժարանի տնօրէն Գարեգին Պարսամեան։
Կրօնական ժողովի ատենապետ Տ. Արամ Արք. Աթէշեան, որ շուրջ շաբաթէ մը ի վեր կը գտնուէր Հայաստան, երէկ վերադարձաւ քաղաքս՝ Երեւան-Իսթանպուլ ուղիղ թռիչքով։ Կը տեղեկանանք, որ ան իր կեցութեան օրերուն Մայր Աթոռ Սուրբ Էջմիածնի մէջ ընդունուած է Ամենայն Հայոց Տ.Տ. Գարեգին Բ. Կաթողիկոսին կողմէ։
Գարակէօզեան Տան Գնալը կղզիի Կազդուրման կայանին մէջ երէկ տեղի ունեցաւ հայերէն բառախաղի աւանդական մրցոյթը։ Միջնակարգերու եւ լիսէներու դասաւորման մէջ ընդհանուր առմամբ 18 խումբ մասնակցեցաւ այս տարուան «բառ-խաղ»ին, որ կազմակերպուեցաւ չորրորդ անգամ։
Իսթանպուլի կուսակալութիւնը երէկ իսկ պաշտօնապէս իրազեկուեցաւ նախօրէին Նախաձեռնարկ մարմնի անդրանիկ ժողովի գումարման եւ դիւանի կազմութեան մասին: Պատրիարքարանէն նահանգապետարան ուղարկուած նամակը ստորագրեցին տեղապահ Տ. Սահակ Եպսկ. Մաշալեան եւ ատենապետ Խոսրով Քէօլէդաւիթօղլու:
Մինչ պատրիարքական ընտրութեան գործընթացի աշխատանքները թափ կը ստանան աստիճանաբար, բոլորին ուշադրութիւնը տակաւին առաջին քայլափոխին կեդրոնացած է երկու հիմնական առաջնահերթութեան վրայ. կանխել ժամանակի կորուստներն ու երաշխաւորել արդարութիւնը: Գումգաբուի մէջ հերթական նիստերը նախատեսուած են ամէն երկուշաբթի:
