Թրքահայ կեանք

Պոլսահայութիւնը Ամանորի տօնական շրջանին ունեցաւ տխուր կորուստ մը։ Խոր ցաւով տեղեկացանք, որ իր մահկանացուն կնքած է վաստակաշատ կրթական մշակ Փասքալ Թէօրէնլի։ Մխիթարեան վարժարանի յայտնի սաներէն մին էր։

Համայնքային շրջանակները երէկ ժամադրուած էին Եշիլգիւղի մէջ։ Ամենապատիւ Տ. Սահակ Ընտրեալ-պատրիարք Սրբազան Հայրը նախագահեց Ս. Ստեփանոս եկեղեցւոյ կրօնական եւ աշխարհիկ աւանդական արարողութիւններուն, որոնք տեղի ունեցան տարեկան անուան տօնախմբութեան եւ մատաղօրհնութեան առթիւ։

Ն.Ա.Տ. Սահակ Բ. Ընտրեալ-պատրիարք Սրբազան Հօր ընտրութենէն ետք, Պատրիարքարանի մէջ շնորհաւորական խանդավառութիւնը կը շարունակուի։ Երեքշաբթի, քոյր եկեղեցիներու ներկայացուցիչներու այցելութեամբ արդէն իսկ սկսած էր եռուզեռ մը։

Ֆէրիգիւղի «Շիրինօղլու» սրահին մէջ երէկ երեկոյեան տեղի ունեցաւ գիրքի շնորհանդէս մը, որ առիթ հանդիսացաւ խանդավառութեան։ Ինչպէս հաղորդած էինք, Մալաթիացի հայոց «Հայտէր» հայրենակցական միութեան եւ «Արաս» հրատարակչութեան համագործակցութեամբ վերջերս լոյս տեսած է Արշակ Ալպոյաճեանի յայտնի «Պատմութիւն Մալաթիոյ հայոց» գիրքի թրքերէն թարգմանութիւնը։

Երէկ երեկոյեան, Շիշլիի քաղաքապետութեան «Ճեմիլ Ճանտաշ-Քենթ» մշակոյթի կեդրոնին մէջ բացուեցաւ յայտնի արուեստագիտուհի Սօսի Ճնտոյեանի երանգաւորման ցուցահանդէսը։ Ան թէեւ համբաւ կը վայելէ որպէս դերասան ու բեմադրիչ, սակայն շուրջ տասն տարիէ ի վեր կը ստեղծագործէ նաեւ երանգաւորման ճիւղին մէջ։

Պաքըրգիւղի Տատեան վարժարանէն ներս վերջին երկու օրերուն տեղի ունեցաւ Ամանորի քէրմէս մը, որ առիթ հանդիսացաւ մեծ խանդավառութեան։ Աւանդական այս ծրագիրը կեանքի կոչուեցաւ տիկնանց յանձնախումբին նախաձեռնութեամբ։

Կեդրոնական վարժարանի 1988 թուականի շրջանաւարտներէն խումբ մը ներկայացուցիչներ երէկ ապրեցան յատկանշական օր մը՝ վերադառնալով իրենց աշակերտութեան տարիներուն։ Այսպէս, 1988-ի խումբ մը շրջանաւարտներ երէկ այցելեցին վարժարան, ուր ջերմ մթնոլորտի մը մէջ հիւրընկալուեցան տնօրէնուհի Սիլվա Գույումճեանի կողմէ։

Ամեն. Տ. Սահակ Ընտրեալ-պատրիարք Սրբազան Հայրը վերջերս հիւրընկալեց Գումգաբուի Ս. Աստուածածին Աթոռանիստ Մայր եկեղեցւոյ թաղային խորհուրդի ատենապետ Հրանդ Մոսկոֆեանն ու գործակից ընկերները, նաեւ թաղի յարակից մարմիններէն խումբ մը ներկայացուցիչներ։

Գատըգիւղի Ս. Թագաւոր եկեղեցւոյ նախաձեռնութեամբ, համանուն մատենաշարի ծիրէն ներս վերջերս լոյս տեսած է «Տարիներ» անուն գիրք մը, որ ձօնուած է վաղամեռիկ բանաստեղծուհի Թալին Էօզգալայճը-Տէօքմէճեանի յիշատակին։

Մխիթարեան վարժարանի մանկապատանեկան երգչախումբը այս տարի եւս մասնակցութիւն բերաւ քաղաքիս՝ Աւստրիոյ մշակոյթի կեդրոնին կողմէ կազմակերպուած Սուրբ Ծննդեան համերգին, որ տեղի ունեցաւ ներկայ շաբթուան սկիզբը։