Թրքահայ կեանք

Աթոռանիստ Մայր եկեղեցւոյ յուզումնախառն հրաժեշտին ներկայ էր նաեւ Ամեն. Ս. Պատրիարք Հայրը:
Նորոգ հանգուցեալ Ռաֆֆի Պօզաճեան յաւերժութեան ճանապարհը բռնեց՝ հոծ թիւով յուղարկաւորներու աղօթակցութեամբ:

Շիշլի մարզակումբի ձմրան դասընթացքները արդէն սկսած են՝ արժանանալով անմիջական ուշադրութեան։ Այս եղանակին դասընթացքներ նախատեսուած են վոլէյպոլի, պասքեթպոլի, փինկ-փոնկի, թենիսի, մարմնամարզի եւ ճատրակի մարզաձեւերուն մէջ։

Ամեն. Ս. Պատրիարք Հայր Սամաթիոյ մէջ յայտնեց, որ իւրաքանչիւրը նախ պէտք է իր տան առջեւը աւլէ:
«Մեր հաստատութիւններու հարստութիւնները պէտք է տնօրինենք ո՛չ թէ դրամատան, այլ եկեղեցական մտայնութեամբ»:

Սուրբ Խաչ դպրեվանքի շրջանաւարտից աւանդական հաւաքին ծաւալուն արժեւորում եւ քննարկումներ:
Փրոֆ. Թորոս Ալճան, Վարուժան Պուլկան եւ Արմէն Սարուխանեան բացատրութիւններ տուին դպրոցի ընդհանուր կացութեան շուրջ: Խնամակալութիւնը ընտրութիւններուն համար ալ իրաւական գետնի վրայ նախաձեռնութիւնները պիտի շարունակէ:

Գոհունակութեամբ վերահասու կ՚ըլլանք, թէ մեր երաժշտական աշխարհի այնքան համակրելի եւ արժէքաւոր դէմքերէն Արթիւր Պաղտասարեան կոչուած է նոր ու պատուաբեր պաշտօնի մը։ Այսպէս, ան նշանակուած է Իսթանպուլի Ֆիլհարմոնիի միութեան գեղարուեստական ղեկավար։

Գոհունակութեամբ վերահասու կ՚ըլլանք, թէ Գուզկունճուքի Ս. Գրիգոր Լուսաւորիչ եկեղեցին վերջերս վերստին խնամքի ենթարկուած է։ Թաղային խորհուրդի աղբիւրները հաղորդեցին, որ եկեղեցւոյ բուն շէնքին համար չեն եղած այս վերջին աշխատանքները, այլ ամրացուած ու վերանորոգուած են արտաքին պարիսպներն ու դարպասը, ինչպէս նաեւ յարակից շէնքերը։

Կը տեղեկանանք, որ Գանտիլլիի Սուրբ Երկոտասան Առաքելոց եկեղեցին ներկայիս ենթարկուած է վերանորոգութեան։ Վոսփորի Ասիական ափի մեր այս գողտրիկ սրբավայրը երկար ժամանակէ ի վեր խնամքի ու ֆիզիքական ամրացման կարիք ունէր, սակայն նախկին շրջաններուն այդ նախագիծը միշտ յետաձգուած էր։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան նախընթաց օր հիւրընկալեց Սամաթիոյ Ս. Գէորգ եկեղեցւոյ թաղային խորհուրդի ատենապետ Եսայի Տեմիրն ու իր գործակից ընկերները։ Ներկայ էր նաեւ թաղի հոգեւոր հովիւ Տ. Զօհրապ Քհնյ. Ճիվանեան։

Գատըգիւղի Ս. Թագաւոր եկեղեցւոյ թաղային խորհուրդը վերջերս անմիջական ու մտերմիկ մթնոլորտի մը մէջ մեծարանքի հաւաքոյթ մը կազմակերպեց թաղի քարոզիչ Տ. Յարութիւն Վրդ. Տամատեանին համար։ Ինչպէս ծանօթ է, ներկայ տարուան առաջին կէսին հայր սուրբը Մայր Աթոռ Սուրբ Էջմիածին մեկնած էր՝ ուսումը կատարելագործելու համար։

Օրթագիւղի Ս. Աստուածածին եկեղեցւոյ թաղային խորհուրդին ղեկը ստանձնելու համար համայնքային շրջանակներու ջանքերով պատրաստուած է թեկնածուներու նոր ցանկ մը:
Ընտրութիւններուն ընդառաջ որդեգրուած ինքնագլուխ գործելաոճն ու զարտուղի նախաձեռնութիւնները ծնունդ տուին շօշափելի հակազդեցութեան եւ այդ խմորումներէն բխեցաւ գործնական շարժում մը: