Հայկական լրահոսին մէջ արձագանգ գտաւ, որ երէկ ժամը 18.00-ի դրութեամբ Ատրպէյճանի սահմանապահները արդէն հաստատուած են Հայաստանի սահմանակից Կիրանց գիւղի՝ սահմանազատուած մասին մէջ։ Կիրանցի քաղաքապետ Կամօ Շահինեան այս կապակցութեամբ յայտարարութիւններ ըրաւ «www.tert.am» կայքէջին։
Հայաստանի անվտանգութեան խորհուրդի քարտուղար Արմէն Գրիգորեան երէկ տեսակցեցաւ Ամերիկայի Միացեալ Նահանգներու պետական քարտուղարի տեղակալ Ուզրա Զէյայի հետ, որ շփումներ ունեցաւ Երեւանի մէջ։ Բարձրաստիճան դիւանագէտը պատասխանատու է քաղաքացիական անվտանգութեան, ժողովրդավարութեան եւ մարդու իրաւանց գծով։
Ռուսաստանի արտաքին գործոց նախարար Սերկէյ Լաւրով Նիւ Եորքի մէջ հանդիպում մը ունեցաւ Իրանի արտաքին գործոց նախարարի պաշտօնակատար Ալի Պաղերի Քանիի հետ։ Իրանի մօտաւոր անցեալի արտահերթ նախագահական ընտրութեան յաջորդած ժամանակաշրջանին սա առաջին բարձր մակարդակի ուղղակի շփումն է Մոսկուա-Թեհրան առանցքին վրայ։
Ամերիկայի Միացեալ Նահանգներու պետական քարտուղարութեան բանբեր Մեթիու Միլըր յայտնեց, որ Հայաստան եւ Ատրպէյճան անհաւանական յառաջընթաց արձանագրած են, բանակցութիւններուն մէջ երկար ճանապարհ անցած են, յամենայնդէպս, ենթադրեալ խաղաղութեան պայմանագրին հասնիլը կողմերէն կը պահանջէ կարգ մը բարդ ընտրութիւններ եւ դժուար զիջումներ կատարել։
Հայաստանի արտաքին գործոց նախարարը ՄԱԿ-է ներս բարձր մակարդակի հանդիպման մը մասնակցեցաւ:
Երեւան վճռորոշ նշանակութիւն կու տայ միջազգային հանրութեան համերաշխութեան եւ արդիւնաւէտ համագործակցութեան:
Հայաստանի եւ Ամերիկայի Միացեալ Նահանգներու զօրքերուն մասնակցութեամբ երէկ սկսան «Արծիւ գործընկեր-2024» ռազմափորձերը։ Այս համատեղ զօրավարժութիւններու սկիզբին հանդիսաւոր արարողութիւն մը տեղի ունեցաւ՝ մասնակցութեամբ Հայաստանի պաշտպանութեան նախարար Սուրէն Պապիկեանի եւ Երեւանի մօտ ԱՄՆ-ի դեսպան Քրիստինա Քվինի։
Բովանդակ Թուրքիան այսօր կը նշէ՝ 15 Յուլիսի ժողովրդավարութեան եւ ազգային միասնականութեան օրը։ Արդէն ութ տարի անցած է պետական յեղաշրջման փորձէն եւ անոր դէմ ցուցաբերուած պատմական դիմադրութեան վրայէն։ Այդ սարսափելի գիշերը անմոռանալի կը մնայ սերունդներու յիշողութեան մէջ՝ մինչ յարգանքով կ՚ոգեկոչուին այն 251 նահատակները, որոնք ինկան ՖԵԹԷՕ ահաբեկչական կազմակերպութեան դաւադրական նախաձեռնութեան հետեւանքով։
Իրանի նորընտիր նախագահին ստորագրած յօդուածը լայն արձագանգ գտաւ միջազգային գետնի վրայ:
Թեհրան մեղմ ազդանշաններ կու տայ համաշխարհային յառաջատար դերակատարներուն եւ տարածաշրջանի ուժերուն:
Թուրքիա այս շրջանին Մերձաւոր Արեւելքի ուղղեալ նախաձեռնութիւններուն մէջ Կազզէի պատերազմին համազօր առաջնահերթութիւն կ՚ընծայէ նաեւ Սուրիոյ իրադարձութիւններուն։ Անգարա-Դամասկոս առանցքին վրայ, ըստ երեւոյթին, հասունցած է բնականոնացման գործընթաց մը։
Հայաստանի վարչապետ Նիկոլ Փաշինեան շաբաթավերջին աշխատանքային այցելութիւն մը տուաւ Գերմանիա, ուր հրաւիրուած էր ՈՒԷՖԱ-ի կողմէ՝ Պերլինի մէջ հետեւելու համար «Եւրօ-2024»ի աւարտականին։
