Պաքըրգիւղի ընտանիքը մեծ խանդավառութեամբ հրաժեշտ տուաւ Տատեան վարժարանի այս տարուան շրջանաւարտներուն։ Դպրոցի «Տիգրան Կիւլմէզկիլ» հանդիսասրահի երդիքին տակ տեղի ունեցաւ շրջանաւարտութեան հանդէսը, որուն ներկայ գտնուեցան Պաքըրգիւղի ընտանիքէն պատասխանատուներ, աշակերտներու ծնողները եւ այլ հիւրեր։
Կէտիկփաշայի «Հրանդ Տինք» վարժարանին մէջ վերջերս տեղի ունեցաւ առաջին դասարաններու ընթերցման տօնը։ Դասարանի ուսուցչուհի Ժաննա Մելքոնեանի վերահսկողութեան ներքեւ պատրաստուած էր օրուան յայտագիրը։
Էսաեան վարժարանի մէջ երէկ երեկոյեան տեղի ունեցաւ բանաստեղծութեան երեկոյթ մը։ «Փունջ մը գեղարուեստ մեր սրտի խորքէն» խորագրեալ այս երեկոյթին ընթացքին լիսէի աշակերտները հայերէն եւ թրքերէն բանաստեղծութիւններ ներկայացուցին։
Ֆէրիգիւղի Մէրամէթճեան վարժարանին մէջ երէկ երեկոյեան տեղի ունեցաւ մասնաւոր ձեռնարկ մը, որու ընթացքին ներկայացուեցան 2016-2017 կրթական շրջանի արտադասարանային գործունէութիւններու արդիւնքները։ Խանդավառ ձեռնարկ մըն էր այս մէկը, որուն ներկայ գտնուեցան Շիշլիի կրթական տնօրէնութենէն Էրթան Տեմիրթաշ, վարժարանի հիմնադրի ներկայացուցիչ Աւետիս Հաճընլեան, տնօրէնուհի Արփի Մանուկեան, Ֆէրիգիւղի Ս. Վարդանանց եկեղեցւոյ թաղային խորհուրդէն ներկայացուցիչներ, ծնողներ եւ հիւրեր։
Տ. Գարեգին Արք. Պեքճեան, Տ. Արամ Արք. Աթէշեան, Տ. Սահակ Եպսկ. Մաշալեան եւ Տ. Զաքէոս Ծ. Վրդ. Օհանեան այս առաւօտ հասան Մայր Աթոռ Սուրբ Էջմիածին:
Պոլսոյ Պատրիարքութեան երեք սրբազաններն ու պատուիրակութեան անդամները մասնակցութիւն կը բերեն եկեղեցական ներկայացուցչական ժողովին, որ պիտի սկսի վաղը:
Հոգեգալստեան տօնը այս տարի եւս աւանդական շուքով նշուեցաւ Պէյօղլուի Սուրբ Երրորդութիւն եկեղեցւոյ մէջ, ուր ստեղծուեցաւ մեծ խանդավառութիւն:
Արարողութիւններուն նախագահեց Պատրիարքական տեղապահ Տ. Գարեգին Արք. Պեքճեան, որ յոյս յայտնեց, թէ մինչեւ տարեվերջ կը լուծուին համայնքի առկայ հարցերը:
Տ. Արամ Արք. Աթէշեան երէկ նախագահեց Սկիւտարի Ս. Խաչ եկեղեցւոյ արարողութիւններուն։ Հոգեգալստեան տօնին առթիւ պատարագեց տեղւոյն հոգեւոր հովիւը՝ Տ. Յուսիկ Քհնյ. Հերկելեան։ Նորին Սրբազնութիւնը տուաւ օրուան պատգամը։
Սկիւտարի մէջ երէկ տեղի ունեցաւ թաղի այժմու ու երբեմնի վարժարաններու շրջանաւարտից տարեկան աւանդական հաւաքը։ Գալֆաեան Տան ննջարանի բաժնի համալիրէն ներս կազմակերպուած էր այս հաւաքոյթը՝ դաշտահանդէսի մը ձեւաչափով։
Պաքըրգիւղի Տատեան սանուց միութեան մէջ շաբաթավերջին տեղի ունեցաւ խանդավառ ցուցահանդէս մը։ Երկար տարիներէ ի վեր Տատեան սանուց միութենէն ներս նկարչական դասընթացքներ կը կազմակերպուին, Մաքրուհի Քէչիեոլուի վերահսկողութեան ներքեւ։
Տեղապահ Տ. Գարեգին Արքեպիսկոպոս Պեքճեանի նախագահութեամբ երէկ Պատրիարքարանի մէջ տեղի ունեցաւ խորհրդակցութիւն մը, որ տեւեց շուրջ երեք ժամ:
Պատրիարքական ընտրութեան գործընթացին թափ տալու ուղղեալ աշխատանքները աստիճանաբար կը սկսին: Համայնքային շրջանակները ուշադրութեամբ կը հետեւին նոր իրադարձութիւններուն:
Նախաձեռնարկ մարմինը պիտի կազմուի ամսոյս երրորդ շաբթուան ընթացքին: Կրօնական ժողովը նիստ պիտի գումարէ Նորին Սրբազնութեան Մայր Աթոռէ եւ Քէօլնէ վերադարձին:
