Էյուպի Ս. Եղիա եկեղեցւոյ մէջ երէկ տեղի ունեցան աւանդական արարողութիւններ, որոնց հանդիսապետեց Կրօնական Ժողովի Ատենապետ Տ. Սահակ Եպսկ. Մաշալեան։ Տարեկան անուան տօնախմբութեան եւ եկեղեցւոյ հիմնադրութեան 185-րդ տարեդարձին առթիւ տեղի ունեցած կրօնական եւ աշխարհիկ արարողութիւնները արժանացան համայնքային շրջանականերու անմիջական ուշադրութեան։
Երէկ երեկոյեան Գումգաբուի Պէզճեան սրահին մէջ տեղի ունեցաւ Ֆէրիգիւղի Մէրամէթճեան վարժարանի այս տարուան շրջանաւարտներուն հրաժեշտի հանդիսութիւնը։ Աննպաստ եղանակին հետեւանքով Գումգաբուի մէջ տեղի ունեցաւ այս հաւաքոյթը, այլապէս այդ մէկը նախատեսուած էր Ֆէրիգիւղի եկեղեցւոյ պարտէզին մէջ բացօթեայ ձեւաչափով։
Մխիթարեան վարժարանը տուն դարձաւ մանկապարտէզի դասարաններու տարեվերջի հանդէսին, որ տեղի ունեցաւ դպրոցի հանդիսասրահին մէջ, ներկայութեամբ Մխիթարեան հայրերու՝ Մագ. Հ. Սարգիս Ծ. Վրդ. Էրմէնի եւ Հ. Յակովբոս Ծ. Վրդ. Չօփուրեանի, Մատակարար մարմնի ատենապետ եւ անդամներու, վարժարանի տնօրէնութեան, ուսուցչաց կազմին եւ ծնողներու:
Երէկ երեկոյեան Էսաեան վարժարանին մէջ տեղի ունեցաւ թատերական ներկայացում մը։ Այսպէս, վարժարանի լիսէի բաժնի թատրոնի խմբակը ներկայացուց «Ահ շու կենչլէր» զաւեշտը, որու հեղինակն է Թուրկուտ Էօզաքման։
2016-2017 կրթական շրջանի վերջին շաբաթը Պաքըրգիւղի Տատեան վարժարանին մէջ բնորոշուեցաւ արտասովոր խանդավառութեամբ։ Այս ամբողջին մէջ մասնաւորապէս կազմակերպուած երգի եւ պարի երեկոյթը առանձնացաւ՝ թէ՛ իր ճոխ յայտագրով եւ թէ աշակերտներու կողմէ տարուած ստեղծագործական աշխատանքի փայլուն արդիւնքով։
Սամաթիոյ Անարատ Յղութիւն վարժարանին մէջ շրջանաւարտութեան հանդէսը վերջին օրերուն տեղի ունեցաւ խանդավառ մթնոլորտի մը մէջ։ Ձեռնարկին ներկայ գտնուեցան Հ. Վարդան Ծ. Վրդ. Գազանճեան, Հ. Աբրահամ Ծ. Վրդ. Ֆրատեան, վարժարանի մատակարար մարմնի ատենապետ Տիգրան Էօզկիւլ եւ իր ընկերները եւ բազմաթիւ հիւրեր, ծնողներ, հաստատութեան համակիրներ։
Երէկ Էսաեան վարժարանին մէջ տեղի ունեցաւ «Էսֆեսթ» փառատօնը, որ ներկայ կրթական շրջանի եզրափակիչ փուլին առիթ հանդիսացաւ մեծ խանդավառութեան։ Լիսէի բաժնի տնօրէնուհի Սաթենիկ Նշանի ողջոյնի խօսքով սկսաւ այս ձեռնարկը, որուն մասնակցեցան համայնքային միւս լիսէներու աշակերտութիւններէն ներկայացուցիչներ։
«Փարոս» հրատարակչութիւնը վերջերս լոյս ընծայեց հետաքրքրական գիրք մը, որով ներկայացուած է շարժանկարի յայտնի բեմադրիչ Արամ Կիւլեիւզի կեանքն ու գործունէութիւնը։ Գիրքի հեղինակն է Պերճուհի Պէրպէրեան։ Երէկ, Ճիհանկիրի «Ճաշ» ճաշարանին մէջ տեղի ունեցաւ այս գիրքին շնորհանդէսը, որուն մասնակցութիւն բերին թրքական շարժանկարի աշխարհէն բազմաթիւ ծանօթ դէմքեր։
Կէտիկփաշայի «Հրանդ Տինք» վարժարանին մէջ վերջերս տեղի ունեցաւ մանկապարտէզի փոքրիկներու տարեվերջի հանդէսը, ինչ որ ստեղծեց մեծ ոգեւորութիւն։ Մանկապարտիզպանուհիներ Մարգրիտ Աւագեանի եւ Նոնա Յարութիւնեանի վերահսկողութեան ներքեւ պատրաստուած էր օրուան յայտագիրը, որուն մաս կազմեցին խմբերգներ, պարեր ու մանաւանդ հիանալի արտասանութիւններ։
Գումգաբուի ընտանիքը երէկ երեկոյեան մեծ խանդավառութիւն ապրեցաւ Պէզճեան Մայր վարժարանի այս տարուան շրջանաւարտներուն համար կազմակերպուած հանդիսութեան առթիւ։ Թաղի համանուն սրահին մէջ տեղի ունեցաւ երեկոյթը, որուն ներկայ գտնուեցան Տ. Մաղաքիա Աբեղայ Պեսքիսիզեան, Տ. Անդրէաս Ա. Քհնյ. Յակոբեան, Ս. Աստուածածին Աթոռանիստ Մայր եկեղեցւոյ թաղային խորհուրդի ատենապետ Հրանդ Մոսկոֆեան եւ իր ընկերները, Մայր վարժարանի հիմնադրի ներկայացուցիչ Սեւան Կիւրիւն, տնօրէնուհի Թալին Նայիր, ուսուցչական կազմէն ներկայացուցիչներ, ծնողներ եւ հիւրեր։
