Թրքահայ կեանք

Շիշլի մարզակումբի վարչութեան ատենապետ Ալէն Թեքպըչաք երէկ հանդիպում մը ունեցաւ Մարմնամարզի ու երիտասարդութեան նախարար Օսման Աշքըն Պաքի հետ։ Թեքպըչաք եւ իր ընկերները նախարարին կողմէ հիւրընկալւեցան Աթագիւղի Ողիմպիական տան երդիքին տակ։

Պատրիարքական տեղապահ Տ. Գարեգին Արք. Պեքճեան վերջին օրերուն դարմանման տակ կը գտնուի Սուրբ Փրկիչ Ազգային հիւանդանոցի մէջ։ Գումգաբուի աղբիւրները հաղորդեցին, որ նորին սրբազնութիւնը կը տառապի պաղառութենէ։

Գալֆաեան Տան երդիքին տակ ընկերամշակութային ձեռնարկները շարունակուեցան վերջին շաբաթներուն։ Թարգմանչաց տօնի շրջանին դպրոցէն ներս տեղի ունեցաւ հանդէս մը, որ կազմակերպուած էր յայտնի արուեստագէտ Արամ Կոստանեանի առաջնորդութեամբ։

Երէկ, հաճոյքն ունեցանք խմբագրատանս մէջ հիւրընկալելու Կէտիկփաշայի «Հրանդ Տինք» վարժարանի կամաւոր հոգաբարձու Դալար-Արթօ Հորոզօղլու ամոլը եւ տնօրէնուհի Հերիքնազ Աւագեանը։ Հաճելի զրոյցի ընթացքին անոնք մեզի տեղեկութիւններ փոխանցեցին դպրոցի ծաւալած գործունէութեան եւ դիմագրաւած դժուարութիւններուն շուրջ։

Գատըգիւղէն խումբ մը հաւատացեալներ նախընթաց օր ուխտագնացութիւն մը կատարեցին դէպի Իզնիք (Նիկիա)։ Ս. Թագաւոր եկեղեցւոյ քարոզիչ Տ. Յարութիւն Աբեղայ Տամատեան եւ հոգեւոր հովիւ Տ. Գրիգոր Ա. Քհնյ. Տամատեան առաջնորդեցին ուխտաւորներու խումբը։

Երէկ յետմիջօրէին, Ֆէրիգիւղի Ս. Վարդանանց եկեղեցւոյ մէջ տեղի ունեցաւ նորոգ հանգուցեալ Մարիամ Գալայճըի փառաշուք յուղարկաւորութիւնը։ Ինչպէս ծանօթ է, մեր համայնքի երէց սերունդի համակրելի դէմքերէն Մարիամ Գալայճը նախընթաց օր Սուրբ Փրկիչ Ազգային հիւանդանոցի մէջ կնքած էր մահկանացուն եւ իր կորուստը խոր ցաւ յառաջացուցած էր համայնքային շրջանակներէ ներս։

Տ. Արամ Արք. Աթէշեան երէկ երեկոյեան մասնակցեցաւ Ռումանիոյ ազգային տօնին առթիւ քաղաքիս մէջ սարքուած պաշտօնական ընդունելութեան։ Իսթանպուլի մօտ Ռումանիոյ աւագ հիւպատոս Սիամպա Ատրիանայի տանտիրութեամբ՝ այս ընդունելութիւնը տեղի ունեցաւ «Քոնրատ» պանդոկին մէջ։

Գատըգիւղի Ս. Թագաւոր եկեղեցւոյ մէջ, շաբաթավերջին Ս. Պատարագի մատուցմամբ կատարուած հոգեհանգստեան պաշտօնով յիշատակուեցան ազգային բարեյիշատակ ու անմոռանալի բարերարներ՝ Աբիկ եւ Մաթուս Ունճեան հարազատները։ Արարողութեանց հանդիսապետեց, Ս. Պատարագը մատոյց եւ աւուր պատշաճի քարոզեց եկեղեցւոյ քարոզիչ Տ. Յարութիւն Աբեղայ Տամատեան։

Համայնքային վաքըֆներու հարթակը (VADİP) երէկ երեկոյեան Սուրբ Փրկիչ Ազգային հիւանդանոցի մէջ գումարեց 2017-2018 շրջանի իր առաջին ժողովը:
Պետրոս Շիրինօղլու. «Ես պատկան մարմիններու պատգամները փոխանցած եմ առանց աղաւաղելու, այսուհետեւ ինձմէ ոչինչ պիտի լսէք պատրիարքական ընտրութեան մասին»:

VADİP-ի ե­րէ­կուան ժո­ղո­վին ըն­թաց­քին Պետ­րոս Շի­րի­նօղ­լու տե­ղե­կա­ցուց, որ Պատ­րիար­քա­կան տե­ղա­պահ Տ. Գա­րե­գին Արք. Պեք­ճեան նա­մա­կով մը դի­մած է Իս­թան­պու­լի կու­սա­կալ Վա­սիփ Շա­հի­նին՝ պա­հան­ջե­լով ժա­մադ­րու­թիւն։