Էսաեան սանուց միութեան վարչութեան նախաձեռնութեամբ երէկ պտոյտ մը կազմակերպուեցաւ դէպի Փոլոնէզգիւղ։ Ամառնամուտի առթիւ կատարուած նախաձեռնութիւն մըն էր այս մէկը, որ պսակուեցաւ փայլուն յաջողութեամբ։
Պատրիարքարանի Երիտասարդաց յանձնախումբը թափով կը շարունակէ իր գործունէութիւնը։ Երէկ երեկոյեան, Ֆէրիգիւղի «Շիրինօղլու» սրահին մէջ տեղի ունեցաւ այս յանձնախումբին կողմէ կազմակերպուած հաւաքոյթ մը։
Երէկ, հաճոյքն ունեցանք խմբագրատանս մէջ հիւրընկալելու ռուսահայ համայնքէն իրաւաբան Սերկէյ Աւագեանն ու Նարինէ Յարութիւնեանը։ Մեր հիւրերուն կ՚ուղեկցէր Գալֆաեան Տան խնամակալութենէն Յարութիւն Շէշէթեան։
Սեբաստահայոց եւ բարեկամներու միութեան նախաձեռնութեամբ, նախընթաց երեկոյեան, «Նազըմ Հիքմէթ» մշակոյթի միութեան երդիքին տակ տեղի ունեցաւ հաճելի համերգ մը։ «Հին Իսթանպուլի ձայները» երգչախումբը այս առթիւ հանդէս եկաւ թրքական երաժշտութեան հայ յօրինողներու ստեղծագործութիւններու կատարումներով։
Էսաեան սանուց միութեան «Մարալ» երգի-պարի համոյթի հիմնադրութեան քառասնամեակին առթիւ շաբաթավերջին յոբելենական ընթրիք մը տեղի ունեցաւ Թաքսիմի «Intercontinental» պանդոկին մէջ։ Այս հաւաքոյթը երաժշտական իսկական խնջոյքի մը վերածուեցաւ։
Գատըգիւղի Ս. Թագաւոր եկեղեցւոյ քարոզիչ Տ. Յարութիւն Աբեղայ Տամատեան վերջերս այցելեց Նիւ Եորք, ուր հանդիսապետեց իր դասընկերներէն մէկուն Ս. Պսակի խորհրդակատարութեան։ Իր կեցութեան օրերուն ան պատարագեց Նիւ Ճըրզիի Ս. Ղեւոնդեանց եկեղեցւոյ մէջ։ Արարողութեան ներկայ էին տեղւոյն հոգեւոր հովիւը՝ Տ. Տիրան Քհնյ. Պոհաճեան ու բազմաթիւ հաւատացեալներ, որոնց շարքին կը գտնուէին նաեւ նախկին պոլսահայեր։
Թոփգաբուի Լեւոն-Վարդուհեան վարժարանին մէջ երէկ տեղի ունեցաւ Մայրերու օրուան առթիւ հանդէս մը։ Մեծ խանդավառութեան առիթ դարձաւ այս ձեռնարկը, որուն ներկայ գտնուեցան Ս. Նիկողայոս եկեղեցւոյ թաղային խորհուրդի ներկայացուցիչներ, դպրոցի պատասխանատուները, կրթական մշակներ, աշակերտներու ծնողներ եւ հիւրեր։
Յայտնի մեներգչուհին Երեւանէն քաղաքս հասնելէ առաջ յայտարարութիւններ ըրաւ ԺԱՄԱՆԱԿ-ին:
Կապի Կալոյեան. «Բոլորին կողմէ սիրուած մեր ժողովրդական երգերով հանդէս պիտի գամ Իսթանպուլի մէջ»:
Գարակէօզեան Տան Գնալը կղզիի Կազդուրման կայանի խնամատար մարմնի նոր կազմը արդէն ձեւաւորուած է։ Ինչպէս հաղորդած էինք, վերջերս ատենապետի պաշտօնին կոչուած էր մեր համայնքի համակրելի դէմքերէն Արի Չոլաք, որ միեւնոյն ժամանակ կը գլխաւորէ Պատրիարքարանի Երիտասարդաց յանձնախումբը։
Պէզճեան Մայր վարժարանին մէջ անցեալ շաբաթավերջին տեղի ունեցաւ աւանդական միջվարժարանային գիտական խրախճանքը, որ այս տարի կազմակերպուեցաւ 15-րդ անգամ։ Համայնքային միջնակարգերու մեծամասնութիւնը մասնակցութիւն բերաւ այս խրախճանքին, որու ծիրէն ներս ներկայացուեցաւ 46 ծրագիր։
