Թրքահայ կեանք

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ Գումգաբուի մէջ հիւրընկալեց Յոյն Ուղղափառ եկեղեցւոյ երիցագոյն մետրապոլիտներէն Քոնստանդին Հարիսիատիսը։ Ան ներկայիս ի պաշտօնէ Նիկիոյ մետրապոլիտն է։

Սանասարեան խանի համար կազմակերպուած փակ մրցոյթը օրակարգի վրայ կը բերէ մտահոգութիւններ:
Ընդդիմադիր երեսփոխան Կարօ Փայլան Ազգային մեծ ժողովէն ներս վերստին արծարծեց առկայ հարցերը յաչս նախարար Էրսոյի. «Եթէ շարունակուող դատավարութիւնը շահի, ապա Հայոց Պատրիարքարանը ի՞նչ պայմաններու ներքեւ յարաբերութիւն մը յառաջ տանիլ պիտի պարտաւորուի մրցոյթէն յաղթական դուրս եկած ընկերութեան հետ»:

Սուրբ Խաչ դպրեվանքի սանուց միութիւնը ներկայիս ձեռնամուխ եղած է՝ դպրեվանքցիներու ընդհանուր հաւաքի մը կազմակերպման։ Շուրջ տարի մը առաջ պաշտօնի կոչուած ներկայ վարչութիւնը ցայսօր բազմաբնոյթ աշխատանք տարած է համախմբելու համար հաստատութեան զանազան սերունդներէ սաները։

Մալաթիահայերու հայրենակցական միութենէն ներս վերջերս գումարուեցաւ հերթական ընդհանուր ժողով, որու ընթացքին ընտրուեցաւ նոր վարչութիւնը։ Ատենապետ Նուրհան Կեզտիրիճիի կողմէ գլխաւորուած վարչութեան մաս կը կազմեն՝ Տաւիտ Էվեափան, Նուպար Օփան, Առէն Տատըրօղլու, Մուրատ Չեքէմ, Մենեքշէ Տիքթաշ, Ասլին Կիւրլէրօղլու, Սարգիս Պոյաճը, Մերիէմ Տելկի, Սեսիլիա Տելկի, Արէտ Շիրին Թաթլըտիլ եւ Էլիզապէթ Փէյնիրճի։

Ն.Ա.Տ. Սահակ Բ. Պատրիարք Հայրը, երէկ, Պատրիարքարանի մէջ ընդունեց Դանիայէն Արտաքին գործոց նախարարութեան Կրօնից եւ հաւատքի ազատութեան պաշտօնակատար Միքայէլ Սուրն ու Դանիոյ դեսպանութեան քաղաքական գործիչ Յոնաս Եազօ Սրույին։ Հանդիպման ներկայ գտնուեցաւ նաեւ Կրօնական ժողովի ատենապետ, Պատրիարքական Աթոռի լուսարարապետ եւ դիւանապետ Տ. Թաթուլ Ծ. Վրդ. Անուշեան։ 

Եթովպական եկեղեցւոյ հիւսիսային Շոա շրջանի առաջնորդ Տ. Ապունա Քեւստոս Եպսկ. Զեքարիաս, իր հետեւորդներուն հետ, նախընթաց օր յետմիջօրէին այցելեց Պատրիարքարան, ուր ընդունուեցաւ Ն.Ա.Տ. Սահակ Բ. Պատրիարք Հօր կողմէ։ Հանդիպումին ներկայ եղաւ նաեւ Կրօնական ժողովի ատենապետ, Պատրիարքական Աթոռի լուսարարապետ եւ դիւանապետ Տ. Թաթուլ Ծ. Վրդ. Անուշեան։ 

Ն.Ա.Տ. Սահակ Բ. Պատրիարք Հայրը, նախընթաց օր, Պատրիարքարանի մէջ ընդունեց Ուաշինկթընէն Սուրբգրոց թանգարանի տնօրէն Էնտի Նիկմանը։ Հանդիպման ներկայ գտնուեցաւ «Կոլոտ Պատրիարք» թանգարանի տնօրէն Վաղարշակ Սրկ. Սերովբեան։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ Գումգաբուի մէջ հիւրընկալեց Իսթանպուլի մօտ Ամերիկայի Միացեալ Նահանգներու աւագ հիւպատոս Տարիա Տերնըլը, որուն կ՚ընկերանար հիւպատոսարանի քաղաքական հարցերու գծով խորհրդականը։ Ամերիկացի դիւանագէտները Պատրիարքարան փութացած էին շնորհաւորելու համար Նորին Ամենապատուութիւնը եւ այս առթիւ հնարաւորութիւն ունեցան ծանօթանալու անոր հետ։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ Գումգաբուի մէջ հիւրընկալեց Թրքահայ ուսուցչաց հիմնարկի վարչութեան ատենապետ Սարգիս Քիւլէկէչն ու իր գործակից ընկերները։ Հիմնարկի վարիչները այս քաղաքավարական այցելութիւնով շնորհաւորեցին Ամեն. Ս. Պատրիարք Հայրը, որուն յղեցին յաջողութեան մաղթանքներ։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ Գումգաբուի մէջ հիւրընկալեց մեր ծանօթ ազգայիններէն Մելքոն Քարաքէօսէն, որ Սամաթիոյ պատուոյ նախագահն է։ Մելքոն Քարաքէօսէ, որ քաղաքավարական այցելութիւնով մը ներկայացած էր Ամեն. Ս. Պատրիարք Հօր, շնորհաւորութեան եւ յաջողութեան մաղթանքներ յղեց Նորին Ամենապատուութեան։