Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ Գումգաբուի մէջ հիւրընկալեց Իսթանպուլի կուսակալ Ալի Երլիքայան։ Յետմիջօրէին տեղի ունեցաւ կուսակալին այցելութիւնը, որու ընթացքին Ամեն. Ս. Պատրիարք Հօր կողքին էր Պատրիարքական փոխանորդ Տ. Գրիգոր Ա. Քհնյ. Տամատեան։
Հայաստանեայց Առաքելական Եկեղեցւոյ Զուիցերիոյ թեմի առաջնորդական տեղապահ Տ. Գուսան Ծ. Վրդ. Ալճանեան այս օրերուն կ՚այցելէ քաղաքս։ Երուսաղէմի Սրբոց Յակոբեանց միաբանութեան անդամ հայր սուրբը նախկին թրքահայ մըն է։
Պատրիարքական Աթոռի Ընկերային օժանդակութեան յանձնախումբը երէկ հերթական ժողովը գումարեց Գումգաբուի մէջ։ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեանի նախագահութեամբ տեղի ունեցաւ նիստը, որու ընթացքին քննարկումներ տեղի ունեցան տարուայ վերջին երկու ամիսներուն համար նախատեսուած օժանդակութիւններուն շուրջ։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան, նախընթաց օր, Պատրիարքարանի մէջ ընդունեց Ենիգաբուի Ս. Թադէոս-Ս. Բարթողիմէոս եկեղեցւոյ թաղային խորհուրդի ներկայացուցիչները՝ գլխաւորութեամբ ատենապետ Մուրատ Քարամանի։ Ներկայ էր նաեւ եկեղեցւոյ երէց Տ. Ներսէս Քհնյ. Այվազեան։
Այս շաբաթավերջին նախատեսուած է Մէրամէթճեան վարժարանի ի նպաստ տարեկան նուիրահաւաքը:
Ֆէրիգիւղի ընտանիքը կը ջանայ հերթական անգամ համայնքային շրջանակներու առաւելագոյն զօրակցութիւնը ապահովել:
Պոլսահայ վարժարաններու տնօրէնները ընթրիքի սեղան մը սարքեցին ի պատիւ իրենց նուիրեալ պաշտօնակցին:
Սաթենիկ Նշանին յուշանուէր մը յանձնուեցաւ առ ի գնահատանք իր բազմամեայ ու երախտաշատ ծառայութեան:
Ֆէրիգիւղի Մէրամէթճեան վարժարանին մէջ Ս. Թարգմանչաց տօնին եւ Հայ մշակոյթի ամսուան առթիւ տեղի ունեցան զանազան ձեռնարկներ։ Բարենպաստ եղանակին ալ ընձեռած հնարաւորութիւնով՝ նախակրթարանի սաները պարտէզին մէջ տառախաղերով ու բառախաղերով նշեցին տօնը։ Անոնք հանդէս եկան խմբերգներով ու պարերով։
ԺԱՄԱՆԱԿ-ի հիմնադրութեան 114-րդ տարեդարձը եւ թերթիս դիմագրաւած լինելութեան մարտահրաւէրները ստեղծած են լայն արձագանգ։ Թէ՛ մեր համայնքային շրջանակներէն եւ թէ արտասահմանէն օրերէ ի վեր մեզի կը հասնին շնորհաւորութեան ու զօրակցութեան պատգամներ։
Թրքահայ ուսուցչաց հիմնարկը միշտ հետամուտ՝ մեր կրթական մշակներու մասնագիտական յառաջընթացին:
Նաթալի Պաղտատ-Քոճապայի վերահսկողութեան ներքեւ կը կազմակերպուին աշխատանոցներ: Անի Կարմիրեան պոլսահայ ուսուցիչներուն ծանօթացուց «Կիւլպէնկեան»ի կողմէ հաստատուած «Զնտուկ» մանկապատանեկան կայքէջը:
Կեդրոնական վարժարանին մէջ նախընթաց օր տեղի ունեցաւ ձեռնարկ մը՝ այս տարի Նոպելեան բժշկանան մրցանակին արժանացած երկու գիտնականներուն՝ փրոֆ. Արտեմ Փաթափութեանի եւ փրոֆ. Տէյվիտ Ճուլիուսի մասին։ Այս ձեռնարկով անոնք ձեւով մը մեծարուեցան թէեւ առանց իրենց մասնակցութեան։
