Ս. Վարդանանց տօնին եւ Բուն Բարեկենդանին առթիւ Էսաեան վարժարանին մէջ տեղի ունեցաւ խանդավառ հանդէս մը։ Հայերէնի եւ գծագրութեան ուսուցիչներու հսկողութեամբ մշակուած էր ծրագիրը։
Մայրենիի միջազգային օրուան առթիւ Եշիլգիւղի հայոց վարժարանին մէջ կազմակերպուեցաւ ձեռնարկ մը, որուն հրաւիրուած էր յայտնի մեներգչուհի Սիպիլ։ Դպրոցի սրահին մէջ ան աշակերտներուն համար մեկնաբանեց իր զանազան յայտնի երգերը։
Պէզճեան Մայր վարժարանին մէջ երէկ հանդէս մը տեղի ունեցաւ Ս. Վարդանանց տօնին եւ Բուն բարեկենդանին առթիւ։ Ուսուցիչներու հսկողութեան ներքեւ պատրաստուած յայտագրին ժամանակ աշակերտները հանդէս եկան զանազան ելոյթներով, որոնք ունէին հասարակաց պատգամ մը՝ յաւերժ պահել հաւատը, լեզուն ու մշակոյթը։
Մխիթարեան վարժարանէն ներս երէկ տեղի ունեցաւ Բարեկենդանի խրախճանք մը։ Մանկապարտէզի, նախակրթարանի եւ միջնակարգի դասարաններու սաներուն համար առանձին փուլերով նախատեսուած էր այս խրախճանքը, որու առթիւ արտակարգօրէն ոգեւոր մթնոլորտ ստեղծուեցաւ դպրոցէն ներս։
Երէկ, Սրբոց Ղեւոնդեանց քահանայից յիշատակութեան տօնին առթիւ Գումգաբուի Ս. Աստուածածին Աթոռանիստ Մայր եկեղեցւոյ մէջ տեղի ունեցան հանդիսաւոր արարողութիւններ, որոնց նախագահեց Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան։
Երէկ, Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան ընդունեց Պէյօղլուի Լուսաւորիչ դպրաց դաս-երգչախումբի նախագահ Տ. Շնորհք Աբեղայ Տօնիկեանը, տնօրէն խորհուրդի անդամներն ու բազմամեայ խմբավար Յակոբ Մամիկոնեանը։ Հանդիպման ներկայ էր նաեւ Պատրիարքական փոխանորդ Տ. Գրիգոր Աւ. Քհնյ. Տամատեան։
Գատըգիւղի Արամեան-Ունճեան վարժարանին մէջ նախընթաց օր նշուեցաւ Մայրենիի միջազգային օրը։ Այս առթիւ նախատեսուած հանդէսին յայտագիրը գործադրուիլ սկսաւ՝ Նորա Միթիլեանի բացման խօսքով։
Մայրենիի միջազգային օրուան առթիւ Սամաթիոյ Սահակեան-Նունեան վարժարանին մէջ տեղի ունեցաւ մասնաւոր ձեռնարկ մը, որ կազմակերպուած էր հայերէնի ուսուցչուհիներէն Ժպտուն Զուրնաճըի եւ Լիանա Պենլիի նախաձեռնութեամբ։ Այսպէս, տղաքը առցանց զրոյց մը ունեցան գերմանաբնակ ակադեմական Իշխան Չիֆթճեանի հետ, որ հայերէնով գրական պլոկ մըն ալ կը ղեկավարէ միեւնոյն ժամանակ:
Շիշլի մարզակումբի եւ Պէյօղլուսփորի մինչեւ 18 տարեկաններու պասքեթպոլի խումբերուն միջեւ երէկ տեղի ունեցաւ բարեկամական հանդիպում մը։ Խոր աւանդոյթներով այս երկու մարզակումբներու վարչայիններն ալ հետեւեցան խաղին, որու սկիզբին խմբապետները փոխանակեցին ծաղիկներ։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ հիւրընկալեց Ֆէրիգիւղի ընտանիքէն ներկայացուցիչներ։ Ներկայ էր նաեւ հոգեւոր հովիւ Տ. Շիրվան Քհնյ. Միւրզեան։ Ս. Վարդանանց եկեղեցւոյ թաղային խորհուրդէն եւ համանուն դպրոց դաս-երգչախումբի տնօրէն խորհուրդէն պատասխանատուներ Գումգաբու փութացած էին Ամեն. Ս. Պատրիարք Հայրը հրաւիրելու համար այս շաբաթավերջի աւանդական տօնակատարութիւններուն։
