Ամենայն Հայոց Տ.Տ. Գարեգին Բ. Կաթողիկոսը նախընթաց օր Մայր Աթոռ Սուրբ Էջմիածնի մէջ հիւրընկալեց Իրանէն խորհրդարանական պատուիրակութիւն մը, որ այցելեց Երեւան։ Այսպէս, Իրան-Հայաստան խորհրդարանական բարեկամութեան խումբի պատգամաւորները Վեհարանի մէջ ընդունուեցան Նորին Սրբութեան կողմէ։
ՄԱԿ-ի ընդհանուր քարտուղար Անթոնիօ Կութերես այցելեց Պէյրութ, ուր ամենաբարձր մակարդակի վրայ հիւրընկալուեցաւ Լիբանանի ղեկավարութեան կողմէ։ Միջազգային օրակարգի վրայ առաջնահերթ ուշադրութեան արժանացաւ ընդհանուր քարտուղարին այցելութիւնը՝ մինչ երկիրը կը դիմագրաւէ լուրջ տագնապ մը՝ քաղաքական եւ տնտեսական ծալքերով։
Պատրիարքական Աթոռի երիտասարդ միաբաններէն Տ. Յարութիւն Աբեղայ Տամատեանի՝ ուսման համար Մայր Աթոռ Սուրբ Էջմիածին մեկնելուն արձագանգները կը շարունակուին։ Անցեալ շաբաթավերջին ան Հայաստանի մէջ առաջին անգամ Ս. Պատարագ մատոյց՝ Ս. Յակոբ Մծբնայ Հայրապետի յիշատակութեան տօնի առթիւ։
Մեծի Տանն Կիլիկիոյ Տ.Տ. Արամ Ա. Կաթողիկոսը շաբաթավերջին պարգեւատրեց Աստուածաշունչի ընկերութեան Արաբական ծոցի երկիրներու մասնաճիւղի ընդհանուր քարտուղար տքթ. Հրայր Ճէպէճեանը, որ բեղուն գործունէութիւն կը ծաւալէ նաեւ՝ որպէս հրապարակագիր։
Հայց. Առաքելական Եկեղեցւոյ Քուէյթի եւ շրջակայից թեմի Կաթողիկոսական փոխանորդ Տ. Պետրոս Վրդ. Մանուէլեան շաբաթավերջին արժանացաւ ծայրագոյն վարդապետութեան աստիճանին։ Մեծի Տանն Կիլիկիոյ Տ.Տ. Արամ Ա. Կաթողիկոսի տնօրինութեամբ, Քուէյթի Ս. Վարդանանց եկեղեցւոյ մէջ, կիրակնօրեայ Ս. Պատարագի ընթացքին տեղի ունեցաւ տուչութեան հանդիսավարութիւնը։
Հայց Առաքելական Եկեղեցւոյ Հիւսիսային Ամերիկայի Արեւմտեան թեմէն ներս նախընթաց օր տեղի ունեցաւ Ս. Գրիգոր Նարեկացիի «Մատեան ողբերգութեան» կոթողային երկի արեւմտահայերէն նոր փոխադրութեան շնորհանդէսը։ Պըրպենքի առաջնորդարանի «Համբար» սրահի երդիքին տակ տեղի ունեցաւ ձեռնարկը՝ հովանաւորութեամբ Թեմակալ առաջնորդ Տ. Յովնան Արք. Տէրտէրեանի։
Մեծի Տանն Կիլիկիոյ Տ.Տ. Արամ Ա. Կաթողիկոսը երէկ Անթիլիասի մէջ ընդունեց Եկեղեցիներու համաշխարհային խորհուրդի (ԵՀԽ) ընդհանուր քարտուղար տքթ. Եոան Սաուքան։ Հանդիպման ներկայ էր նաեւ Քարլա Խիժոյեան, որ ԵՀԽ-ի մօտ Մեծի Տանն Կիլիկիոյ Կաթողիկոսութեան ներկայացուցիչն է։
Ամենայն Հայոց Տ.Տ. Գարեգին Բ. Կաթողիկոսը երէկ Մայր Աթոռ Սուրբ Էջմիածնի մէջ հիւրընկալեց Պաղեստինի ինքնավարութեան Եկեղեցիներու հարցերով բարձրագոյն նախագահական կոմիտէի ղեկավար Մուհսին Իլիաս Եուսուֆ Խուրիի կողմէ գլխաւորուած պատուիրակութիւնը։
Մեծի Տանն Կիլիկիոյ Տ.Տ. Արամ Ա. Կաթողիկոսը շաբաթավերջին Անթիլիասի մէջ հիւրընկալեց Պէյրութի մօտ Հայաստանի դեսպան Վահագն Աթաբէկեանը։ Հանդիպման ընթացքին քննարկուեցան հայութեան օրակարգի զանազան հարցերը՝ տարածաշրջանի աշխարհաքաղաքական եւ դաւանաքաղաքական ծիրէն ներս։
Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան շաբաթավերջին տեղւոյն վրայ ծանօթացաւ այն բարենորոգման աշխատանքներուն, որոնք Ֆէրիգիւղի Ս. Վարդանանց եկեղեցւոյ մէջ յառաջ կը տարուին։
