Արխիւ

Եշիլգիւղի Ս. Ստեփանոս եկեղեցւոյ մէջ, անցեալ կիրակի՝ Բարեկենդան Վարագայ Ս. Խաչի, պատարագեց եւ քարոզեց Տ. Եզնիկ Արք. Պետրոսեան, որ Յունաստանի Կրետէ կղզիի Ս. Յովհաննէս Կարապետ եկեղեցւոյ տեսուչն է։ Ս. Պատարագի ընթացքին Նորին Սրբազնութեան առընթերակայ էր Տ. Նաթան Քհնյ. Արապեան։

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան երէկ ընդունեց Սամաթիոյ ընտանիքին ներկայացուցիչները՝ Ս. Գէորգ եկեղեցւոյ եւ Սահակեան-Նունեան վարժարանի ի նպաստ տարեկան աւանդական մատաղօրհնութեան ընդառաջ։

Ամերիկահայ գիտնական, ձեռներէց եւ ազգային բարերար Նուպար Աֆէեանի եւ ընտանիքին կողմէ հիմնադրուած համանուն՝ «Աֆէեան» հիմնադրամը ելմտական օժանդակութիւն տրամադրած է՝ Արցախէն տեղահանեալ ընտանիքներուն։

ՄԱԿ-ի ընդհանուր ժողովի 79-րդ նստաշրջանը արդէն սկսած է։ Համաշխարհային կազմակերպութեան Նիւ Եորքի կեդրոնէն ներս ներկայիս նոր նստաշրջանի բացման առթիւ ստեղծուած է աշխոյժ մթնոլորտ։ Ինչպէս ամէն տարի, այս տարի եւս սեպտեմբեր ամսուան երկրորդ կէսը կը բնորոշուի ՄԱԿ-ի նոր նստաշրջանի բացման բարձր մակարդակի իրադարձութիւններով։

ԱՆՈՒՇ ԹՐՈՒԱՆՑ

Ամենայն Հայոց Կաթողիկոսութեան եւ Մայր Աթոռ Սուրբ Էջմիածնէ ներս տեղի ունեցած անցուդարձերը լաւագոյնս կը լուսաբանուի Մայր Աթոռի «Էջմիածին» հանդէսին մէջ:

ՄԱՇՏՈՑ ՔԱՀԱՆԱՅ ԳԱԼՓԱՔՃԵԱՆ

«Ո՞ւր է, ո՛վ մահ, քու խայթոցդ ո՞ւր է, ո՛վ գերեզման, քու յաղթութիւնդ». (Ա ԿՈՐՆԹ. ԺԵ 55)։
23 սեպտեմբեր 2007 թուականը այս տրուպ, խոնարհ գրիչին համար աշնանամուտ մըն է, քանի որ այդ թուականին ան իր Երէցկինը՝ անձնուէր կրթական մշակ Աննիկ Գալփաքճեանը յաւիտենականութեան ուղարկեց հոն՝ ուր այլեւս մահ չկա՛յ եւ անմահութի՛ւնն է, որ կը տիրէ։

ՀՐԱՅՐ ՏԱՂԼԵԱՆ

Գրականութեան հարուստ պատմութեան, ինչպէս նաեւ տարբեր մշակոյթներու կամրջման մէջ կարեւոր դեր ունեցած են թարգմանիչները, որոնք լեզուական սահմանները անցնելով կարեւորած են գաղափարն ու փիլիսոփայական մտածողութիւնը. անոնք միակ միջոցն էին օտար աշխարհը ծանօթացնելու ուրիշներուն. անոնց թարգմանական աշխատանքն էր հայելին Եւրոպայի, Ամերիկայի եւ այլ երկիրներու մտածողութեան եւ այդ իսկ պատճառով գրականութեան, ինչպէս նաեւ ընկերութեան մէջ կարեւոր դեր մը ունէին, սակայն այսօր կը տեսնենք, թէ նուազած է անոնց ունեցած կարեւորութիւնը, չըսելու համար ընդհանրապէս վերացած:

ՄԱՇՏՈՑ ՔՀՆՅ. ԳԱԼՓԱՔՃԵԱՆ

Հայաստանեայց Առաքելական Եկեղեցւոյ աշխարհացրիւ հօտը այսօրուան դրութեամբ կը դիմաւորէ բացառիկ շաբաթ մը, որու իւրաքանչիւր օրը զանոնք պիտի առաջնորդէ դէպի Սրբալոյս Միւռոնի օրհնութեան եւ Սուրբ Էջմիածնի Մայր Տաճարի վերաօծման արարողութիւնները։

Շաբաթավերջին, Հայաստանի Պատմութեան թանգարանէն ներս ցուցադրութեան դրուեցաւ Անահիտ աստուածուհիի պրոնզէ քանդակը, որ բրիտանական թանգարանի հաւաքածոյին մաս կը կազմէ։ Հայաստանի անկախութեան 33-րդ տարեդարձի օրուան զուգադիպեցաւ այս բացառիկ հնութեան ցուցադրութեան սկիզբը։