Եւրոմիութիւն-Հայաստանի Հանրապետութիւն Գործընկերութեան խորհուրդի երկրորդ հերթական նիստը երէկ տեղի ունեցաւ Պրիւքսելի մէջ:
Եւրոպական կողմը վերահաստատեց իր աջակցութիւնը Անգարա-Երեւան փոխյարաբերութիւններու՝ առանց նախապայմաններու բարելաւման ուղղութեամբ:
Ումմանի ծոցին մէջ երկու նաւթատարներ երէկ ենթարկուեցան յարձակման:
Ուաշինկթընի ղեկավարութիւնը դէպքի պատասխանատուութիւնը կը վերագրէ Իրանին:
Մարտինի երեսփոխան Թումա Չելիք Ազգային մեծ ժողովի օրակարգին վրայ բերաւ ասորիներու ենթարկուած կոտորածներու խնդիրը։ ՀՏՓ-ական պատգամաւորը խորհրդարանի դիւանին ներկայացուց առաջարկ մը, որպէսզի ուսումնասիրուին համապատասխան պաշտօնական փաստաթուղթերը, ի յայտ բերուին շարունակուող ազդեցութիւնները եւ առիթ մը ստեղծուի անցեալի հետ առերեսման համար։
Հանրապետութեան նախագահը երէկ դռնփակ հանդիպում մը ունեցաւ ԱՔ կուսակցութեան խորհրդարանական խմբակի երեսփոխաններուն հետ:
Ըստ Րէճէպ Թայյիպ Էրտողանի, Ս-400 հրթիռները յաջորդ ամիս պիտի յանձնուին Թուրքիոյ, իսկ Ֆ-35 ռազմաօդանաւերու համար հաշիւ պիտի պահանջուի:
Իրաւական համակարգէ ներս բարեփոխումներու պատրաստութեան շրջանին ուշագրաւ վիճակ:
Հայաստանի Արդարադատութեան նախարար Արտակ Զէյնալեան պաշտօնէն հրաժարեցաւ ուշագրաւ ժամկէտով մը:
Վրաստանի Պաշտպանութեան նախարար Լեւան Իզորիա եւ Ատրպէյճանի Պաշտպանութեան նախարար Զաքիր Հասանով երէկ հանդիպում մը ունեցան Կեպելէի մէջ։ «Արմէնփրէս»ի հաղորդումներով, անոնք քննարկեցին ռազմական ոլորտէ ներս երկկողմանի յարաբերութիւններու ընթացքը եւ յոյս յայտնեցին, թէ համագործակցութիւնը ա՛լ աւելի պիտի խորանայ ապագային։
Յոյն Ուղղափառ եկեղեցւոյ Հիւսիսային Ամերիկայի առաջնորդ ընտրուեցաւ մետրապոլիտ Էլփիտոֆորոս Լամպրինիատիս։ Ֆէնէրի Յունաց Պատրիարքարանէն ներս, Տ.Տ. Պարթոլոմէոս Ա. Ծայրագոյն Պատրիարքի նախագահութեամբ գումարուած սինոդը միաձայնութեամբ զինքը ընտրած է այս պաշտօնին։
Գառնիի մէջ կայանալիք ելեկտրոնային երաժշտութեան փառատօնը պիտի նպաստէ միլիոնաւոր մարդոց տեղեկանալու այս յուշարձանի գոյութեան մասին։
Կառավարութիւնը թոյլ պիտի տայ Հայաստանի Մշակոյթի նախարարութեան «Պատմական մշակութային արգելոց-թանգարաններու եւ պատմական միջավայրի պահպանութեան ծառայութիւն» ՊՈԱԿ-ին, 6 միլիոն դրամի շրջանակներու մէջ, «Triangulum Community» ընկերութեան հետ միատեղ «Գառնի» պատմական մշակութային արգելոց-թանգարանի տարածքին կազմակերպել ելեկտրոնային երաժշտութեան փառատօն:
Երեւանի մէջ տեղի ունենալիք Եւրոպայի ֆութպոլի 19 տարեկանէն վար ախոյենութիւնը կը սկսի 14 յուլիսին՝ Հայաստան-Սպանիա բացման մրցումով, յայտնեց Հայաստանի ֆութպոլի դաշնակցութեան պաշտօնական կայքէջը:
Երեւանի մէջ Մանուկներու պաշտպանութեան օրը պատրաստեցին Հայաստանի ամենէն երկար փիցցան, որուն երկարութիւնը 13 մեթր էր, լայնութիւնը՝ 65 սանթիմեթր: «Տորիա կարտա» ընկերութեան շուկայադրումի եւ վաճառքի բաժնի տնօրէն Սիրան Ապաճեան լրագրողներու հետ զրոյցի ընթացքին ըսաւ, որ այս չափանիշը հաւանաբար կ՚ընդգրկուի «Դիւցազնագիրքին մէջ»:
