ԻՍԹԱՆՊՈՒԼԻ ԿՈՒՍԱԿԱԼ ԿԻՒԼԻ ՀԵՏ ԺԱՄԱԴՐՈՒԹԻՒՆ՝ 28-Ը ՍԵՊՏԵՄԲԵՐԻՆ

Իսթանպուլի կուսակալ Տաւուտ Կիւլ յառաջիկայ սեպտեմբերի 28-ին պիտի ընդունի թրքահայ վարժարաններու ներկայացուցիչները։ ERVAB-ի երէկուան ժողովին ընթացքին այս մասին մանրամասնութիւններ հրապարակեց՝ ԱՔ կուսակցութեան Իսթանպուլի երեսփոխան Սեւան Սվաճըօղլու։ Կուսակալ Կիւլի հետ նախատեսուած ժամադրութեան հիմնական օրակարգը պիտի ըլլայ՝ համայնքային վարժարաններու շէնքերու երկրաշարժի դէմ ամրակայման, դիմադրունակութեան բարձրացման խնդիրը։

Համայնքային շրջանակները երկար ժամանակէ ի վեր մտահոգութեան մէջ են՝ թրքահայ վարժարաններու շէնքերու ամրութեան հարցերուն շուրջ։ Մասնագիտական տեղեկագրերը ցոյց կու տան, որ կացութիւնը այդքան ալ փայլուն չէ։ Ուստի, այդ շէնքերու ամրակայման համար պետութեան զօրակցութիւնը կ՚ակնկալուի։

Սեւան Սվաճըօղլու երէկուան հանդիպման ընթացքին յայտնեց, որ նահանգապետարանի մէջ նախատեսուած խորհրդակցութիւնը այդ օրակարգով պիտի ընթանայ եւ պաշտօնական մարմինները պատրաստակամ են ընելու իրենց հնարաւորը՝ այս խնդրի կարգաւորման համար։