ՏԱՏԵԱՆ ՎԱՐԺԱՐԱՆԻ ԱՒԱՐՏԱԿԱՆ ԴԱՍԱՐԱՆԻ ՍԱՆԵՐՈՒՆ ՊՏՈՅՏԸ

Պաքըրգիւղի Տատեան վարժարանի աւարտական դասարանի սաները այս տարի եւս իրականացուցին պտոյտ մը՝ ամառնամուտի շրջանին: Դպրոցէն հրաժեշտ առնելէ առաջ, ութերորդ դասարանի տղաքը այս պտոյտը իրականացուցին՝ մէկ կողմէ բարձր տրամադրութեան պայմաններով զիրար վայելելով, իսկ միւս կողմէ դպրոցէն հրաժեշտ առնելու յուզումնախառն պահուն ընդառաջ: 

Աւարտական դասարանի աշակերտները, դպրոցի տնօրէնուհիին կողմէ գլխաւորուած կրթական մշակները միասնաբար իրականացուցին այս պտոյտը: Թիւով 49 հոգիէ բաղկացեալ խումբը ճանապարհորդութիւն մը իրականացուց դէպի Եգէականի շրջան: Տատեանցիները այցելեցին Շիրինճէ գիւղը, Եփեսոսն ու շրջակայքը, իսկ վերադարձի ճանապարհին հանդիպեցան նաեւ Փամուքքալէ: 

Այս ուղեւորութիւնը մասնակիցներուն տեսակէտէ եղաւ թէ՛ հաճելի ժամանց մը եւ թէ հնարաւորութիւն ստեղծեց բնութեան հետ շփուելու, մշակութային եւ պատմական նիւթերու շուրջ տարրական պատկերացում մը կազմելու:

Երկուշաբթի, Մայիս 18, 2026