ՇՆՈՐՀԱՒՈՐԱԿԱՆ

Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան շնորհաւորական մը ուղարկեց Հայաստանի Հանրապետութեան նորընտիր նախագահ Վահագն Խաչատուրեանի, որ արդէն երդուելով ձեռնարկած է իր պաշտօնին։ Այս առթիւ Ամեն. Ս. Պատրիարք Հայրը մաղթած է, որ նորընտիր նախագահի պաշտօնավարութիւնը Հայաստանի Հանրապետութեան համար ըլլայ բարեբեր եւ արդիւնաւէտ՝ առկայ դժուարութիւններու յաղթահարման ճանապարհին։ Նորին Ամենապատուութիւնը այս առթիւ մաղթած է նաեւ, որ Թուրքիա-Հայաստան յարաբերութիւններու բնականոնացման գործընթացը բարերար ազդեցութիւն գործէ երկու երկիրներու միջեւ բարիդրացիական յարաբերութիւններու ձեւաւորման վրայ։ Ան յիշեցուցած է, որ իր երջանկայիշատակ նախորդներն ալ միշտ ունեցած են այդ վառ փափաքը։