Արխիւ

Վաղը Փարիզի մէջ պիտի վերաբացուի «Նոթրը Տամ» աշխարհահռչակ տաճարը, որ համաքրիստոնէական սրբավայր մը ըլլալու առընթեր, համամարդկային ժառանգութեան գլուխ գործոցներէն է։ 2019 թուականին ծագած հրդեհին հետեւանքով լրջօրէն վնասուած այս տաճարը անցեալ հինգ տարիներուն վերանորոգուեցաւ՝ շուրջ 700 միլիոն եւրօ ներդրումով։

Անգարա կը վերահաստատէ իր սպասումը՝ Երեւան-Պաքու խաղաղութեան պայմանագրի ստորագրման համար:
Հաքան Ֆիտան եւ Արարատ Միրզոյեան զրուցեցին ԵԱՀԿ-ի անդամ երկիրներու արտաքին գործոց նախարարներու հաւաքի ծիրէն ներս:

Թուրքիոյ Հայ կաթողիկէ հասարակութիւնը այս շրջանին նոր վիճակաւոր մը ունենալու սպասման մէջ է։ Մինչեւ նոր հոգեւոր առաջնորդի ընտրութիւնը, անցումային շրջանին, պատրիարքական կառավարիչի հանգամանքով արքեպիսկոպոսարանի ղեկը ստանձնած է Հ. Վարդան Ծայրագոյն Վարդապետ Գազանճեան, որ վերջին օրերուն այցելեց մայրաքաղաք Անգարա, ուր հիւրընկալուեցաւ բարձր մակարդակի վրայ։

ԱՆՈՒՇ ԹՐՈՒԱՆՑ

Հայ իրականութեան մէջ արեւմտահայերէն մշակոյթի զարգացման միակ խոշոր նպաստի ծրագիրը այս տարի նոյնպէս յայտարարեց իր նպաստառուները: «Գալուստ Կիւլպէնկեան» հիմնարկի Հայկական համայնքներու բաժանմունքի «արդ եւս» խորագրեալ դրամաշնորհի ծրագիրը չորրորդ տարին ըլլալով օժանդակութիւններ կը տրամադրէ յաջողակ գաղափարներուն, որոնք միտուած են արեւմտահայերէնով յառաջադէմ կիրարկութեան համար:

Լիզպոնի «Գալուստ Կիւլպէնկեան» հիմնարկի Հայկական համայնքներու բաժանմունքը վերջերս 15 հազար ամերիկեան տոլար յատկացուցած է «Արփի» հրատարակչատան՝ պատանեկան երկու վէպերու լոյս ընծայման նպատակով։

Սուրիոյ տագնապալի մթնոլորտի պայմաններով, երբ Հալէպը ընդդիմութեան զինեալներու հակակշռին տակ անցած է, համայն հայաշխարհը մտահոգուած է տեղւոյն հայութեան համար։ Հանրային կարծիքէն խաւեր կ՚ակնկալեն Հալէպի հայութեան Հայաստան տարհանումը։

Նաիրոպիի մօտ Հայաստանի Հանրապետութեան նորանշանակ դեսպան Սահակ Սարգսեան երէկ իր հաւատարմագիրը յանձնեց Քենիայի նախագահ Վիլիըմ Ռութոյին։ Պաշտօնական աղբիւրներու հաղորդումներով, դեսպանի եւ նախագահի զրոյցին ընթացքին անդրադարձ կատարուեցաւ միջազգային կազմակերպութիւններու շրջանակներէն ներս համագործակցութեան ամրապնդման հեռանկարներուն։

ՆԱԹՕ-ի անդամ երկիրներու արտաքին գործոց նախարարները ժողով մը գումարեցին Պրիւքսէլի մէջ:
Հաքան Ֆիտան մասնակցեցաւ Հիւսիսատլանտեան խորհուրդի աշխատանքային նիստին, նաեւ ունեցաւ երկկողմանի հանդիպումներ:

Գուրուչէշմէի Երեւման Ս. Խաչ եկեղեցւոյ մէջ նախընթաց օր տեղի ունեցան Ս. Մինասի տօնակատարութիւններ, որոնց նախագահեց Տ. Յովակիմ Վրդ. Սերովբեան, որ տուաւ նաեւ քարոզ մը։ Ս. Մինասի, Երմոգինեսի, Գրաբոսի եւ կամաւոր աղքատներ Յովհաննէսի եւ Ալէքսիանոսի յիշատակութեան տօնին առթիւ պատարագեց Տ. Գասպար Աբեղայ Կարապետեան։