ՎԵՐԱՄՈՒՏ, ԲԱՐԻ ԳԱԼՈՒՍՏ

Սեպտեմբերը շատերու համար փոփոխութիւններու ամիս մըն է։ Ամառը անցած է, արձակուրդները աւարտած են եւ երեխաները կը վերադառնան դասի։ Դպրոցներու բացումը ո՛չ միայն նոր տարեշրջանի մը սկիզբն է, այլեւ՝ նոր յոյսերու, նպատակներու եւ զարգացումներու ժամանակաշրջան մը։

Նոր ուսումնական տարուան սկիզբը կը բերէ զանազան զգացումներ՝ ո՛չ միայն աշակերտներուն, այլեւ ուսուցիչներուն եւ ծնողներուն համար։ Աշակերտները կը վերադառնան իրենց ընկերներուն, նոր դասագիրքերով, նոր նիւթերու եւ յոյսերու աշխարհ։ Անոնցմէ շատեր կը սիրեն դպրոցը, սակայն կան նաեւ անոնք, որոնք դժուարութիւն ունին վերադառնալու կարգապահ եւ պահանջկոտ միջավայրի մը։ Այդ պատճառով է, որ ուսուցիչները մեծ դեր ունին՝ զանոնք ոգեւորելու եւ սէր արթնցնելու ուսման հանդէպ։

Աշակերտներու համար, տարեմուտը բազմազան զգացումներու աղբիւր է։ Ուրախութիւն՝ կրկին դասընկերները տեսնելու, հետաքրքրութիւն՝ նոր նիւթեր սորվելու, բայց նաեւ գուցէ սթրես եւ անորոշութիւն՝ յառաջիկայ փորձարկումներուն, քննութիւններուն եւ ակնկալութիւններուն առընչութեամբ։ Սակայն ի վերջոյ, դպրոցը այն վայրն է, ուր երեխայ մը կ՚աճի ո՛չ միայն մտքով, այլեւ հոգիով։ Ան կը սորվի շփուիլ, իր կարծիքը արտայայտել, լսել ու համագործակցիլ։

Ուսուցիչներուն համար նոր տարեշրջանը կը նշանակէ նոր ծրագիրներու պատրաստութիւն, նոր դասերու կազմակերպում եւ աշակերտներուն անհատական կարիքներուն արձագանգելու պատասխանատուութիւն։ Անոնք դեր մը կը խաղան ո՛չ միայն որպէս կրթիչներ, այլեւ՝ ոգեշնչող կերպարներ, խորհրդատուներ եւ երբեմն իսկ՝ երկրորդ ծնողներ։ Լաւ ուսուցիչ մը կրնայ ամբողջ կեանք մը ազդել աշակերտի մը ուղիին վրայ։

Ուսուցիչներուն համար, տարեմուտը առիթ մըն է նոր սերունդի մը հետ աշխատելու, իրենց փորձառութիւնը փոխանցելու եւ երիտասարդ միտքեր կերտելու։ Դասարան մը միայն սենեակ մը չէ՝ ան փոքր աշխարհ մըն է, ուր գրեթէ ամէն օր կարելի է ականատես ըլլալ փոփոխութեան, բացայայտումի եւ աճի պահերուն։ Ուսուցիչը միայն գիտելիքի փոխանցող մը չէ, այլ առաջնորդ մը՝ որ կը մղէ, կ՚ոգեւորէ եւ կը հասկնայ։

Ծնողներուն դերակատարութիւնը նոյնպէս կարեւոր է։ Դպրոցը ընտանիքէն հեռու միջավայր մըն է, բայց աշակերտի մը յաջողութիւնը մեծապէս կախեալ է ընտանեկան աջակցութենէն։ Ծնողը, որ հետաքրքրուած է իր զաւակին կրթութեամբ, միշտ կրնայ տարբերութիւն մը ընել՝ թէ՛ դաստիարակութեան եւ թէ յաջողութեան գծով։

Ծնողներուն համար սեպտեմբերը նաեւ նոր պարտականութիւններու սկիզբն է։ Անոնք կը մասնակցին իրենց զաւակներուն կրթութեան՝ պատրաստելով գիրքեր, հագուստ եւ հոգ տանելով, որ զաւակները պատրաստ ըլլան նոր տարուան մարտահրաւէրներուն։ Ընտանեկան աջակցութիւնը ուսման մէջ անփոխարինելի կարեւորութիւն ունի։

Դպրոցը այն վայրն է, ուր կը զարգանան ո՛չ միայն մտային կարողութիւնները, այլեւ բարոյական արժէքներն ու ընկերային պատասխանատուութիւնը։ Հետեւաբար, անհրաժեշտ է ստեղծել այնպիսի միջավայր մը, ուր ամէն աշակերտ կրնայ զգալ ապահով, սիրուած եւ արժեւորուած։

Այսօրուան աշխարհի մէջ կրթութիւնը արժէք ունի աւելի քան երբեք։ Արագ փոխուող, մրցակցային հասարակութեան մը մէջ միայն այն աշակերտները, որոնք լաւ հիմքեր ստացած են, կրնան յաջողիլ եւ նպաստել իրենց ընկերութեան զարգացման։ Այդ պատճառով դպրոցը պէտք է ըլլայ ապահով, սիրալիր եւ ներշնչող վայր մը, ուր երեխաները կրնան ո՛չ միայն գիտելիք ստանալ, այլեւ՝ զարգացնել իրենց մտածողութիւնը, արժէքներն ու ինքնութիւնը։

Այս տարեշրջանը կրնայ բերել նոր մարտահրաւէրներ, բայց նաեւ նոր յաղթանակներ։ Թող դպրոցներու դռները բացուին գիտութեան, ընկերութեան, ստեղծագործութեան եւ խաղաղ համակեցութեան ուղղութեամբ։ Թող այս նոր տարին ըլլայ պտղաբեր, ոգեւորիչ եւ յիշարժան՝ բոլոր աշակերտներուն, ուսուցիչներուն եւ ծնողներուն համար։

ՊԻԱՆՔԱ ՍԱՐԸԱՍԼԱՆ