EICMA. ԱՇԽԱՐՀԻ ԱՄԵՆԱՄԵԾ ՇԱՐԺԱՆԻՒԻ ՑՈՒՑԱՀԱՆԴԷՍԸ ՄԻԼԱՆՈՅԻ ՄԷՋ

Եթէ երբեք սիրած էք շարժման ազատութիւնը, քամիին շունչը դէմքերնուդ եւ «երկաթէ ձիու» մը հզօր թափը, ուրեմն, վստահաբար, պիտի հետաքրքրուիք EICMA-ին հետ։

Այս ցուցահանդէսը, որ ամբողջ անունով կը կոչուի «Esposizione Internazionale Ciclo Motociclo e Accessori», աշխարհի ամենահռչակաւոր եւ ամենամեծ շարժանիւի եւ երկակի անիւով մեքենաներու ցուցահանդէսն է։ Ամէն տարի կը կազմակերպուի Իտալիոյ տնտեսութեան սրտին՝ Միլանոյի մէջ եւ կը հաւաքէ հազարաւոր մասնակիցներ, արտադրողներ, նորարարներ ու երկաթէ ձիերու սիրահարներ աշխարհի բոլոր կողմերէն։

EICMA-Ի ՊԱՏՄՈՒԹԻՒՆԸ ԵՒ ՆՊԱՏԱԿԸ

EICMA-ի արմատները կը հասնին 1914 թուականին, երբ Իտալիոյ մէջ առաջին անգամ բացուեցաւ փոքր ցուցահանդէս մը, ուր ցուցադրուեցան այն ժամանակի նորագոյն շարժանիւները եւ նման փոքր մեքենաները։ Տասնամեակներու ընթացքին այս համեստ միջոցառումը վերածուեցաւ շարժական թեքնոլոժիի համաշխարհային կեդրոնի։

Այսօր EICMA-ն կը նկատուի ո՛չ միայն նոր շարժանիւներու ցուցադրութեան վայր մը, այլեւ գաղափարական հարթակ մը, ուր կը բախին նորարարութիւնները եւ արագութեան հանդէպ մարդկային կիրքը։

EICMA-ի հիմնական նպատակն է ներկայացնել նոր մոտելներ եւ շարժիչային նորագոյն լուծումներ։ Այլ նպատակ մըն է նաեւ տարածել գիտելիք ու մշակոյթ՝ երկու անիւով շարժունակութեան շուրջ եւ միաւորել արտադրողները, լրագրողները, գործարարներն ու հասարակութիւնը հասարակաց հարթակի մը վրայ։

Ամէն տարի նոյեմբեր ամսուան ընթացքին՝ «Fiera Milano Rho»ի հսկայ տարածքը կը լեցուի հազարաւոր գունաւոր շարժանիւներով, լուսաւոր ցուցասրահներով եւ շարժման ձայնով։

Այստեղ կը ցուցադրուին շարժանիւներ, «սքութըր»ներ, ելեկտրական մոպիլեթի սարքեր, նաեւ մասնագիտական պարագաներ՝ սաղաւարտներ (helmet), հագուստ, պաշտպանական սարքեր, նաեւ արհեստական բանականութեամբ կառավարման համակարգերէն մինչեւ ինքնակառավարուող շարժիչներ։

Բացի հիմնական ցուցադրութենէն, կայ նաեւ բացօթեայ վայր մը՝ «MotoLive», ուր կը կազմակերպուին մրցարշաւներ, ցուցադրութիւններ եւ փորձարկումներ։ Այցելուները կրնան անձամբ նստիլ նոր շարժանիւներու վրայ, զգալ անոնց ուժը եւ տեսնել, թէ ինչպէս կ՚աշխատին նոր սերունդի շարժիչները։

ՄԻՋԱԶԳԱՅԻՆ ԲՆՈՅԹ ԵՒ ՄԱՍՆԱԿԻՑՆԵՐ

EICMA-ին կը մասնակցին աւելի քան 180 երկիրներու ներկայացուցիչներ։ Ներկայ են գրեթէ բոլոր մեծ ընկերութիւնները՝ Honda, Yamaha, Ducati, BMW, KTM, Triumph, Aprilia, Suzuki եւ ուրիշներ, նաեւ փոքր, բայց խիզախ նորաստեղծ վաճառանիշեր, որոնք կը փորձեն իրենց տեղը գտնել շուկային մէջ նորարար գաղափարներով։

Յաճախորդներու, ճարտարագէտներու եւ մամուլի ներկայացուցիչներու միջեւ ստեղծուած այս շփումը կը նպաստէ, որ նոր գաղափարներ ծնին, համագործակցութիւններ ստեղծուին եւ շարժանիւի մշակոյթը շարունակէ զարգանալ։

2025 թուականի ցուցահանդէսը տեղի կ՚ունենայ նոյեմբերի 4-9 թուականներուն միջեւ։ Առաջին երկու օրերը բացուեցան միայն մասնագէտներու, մամուլի եւ ընկերութիւններու ներկայացուցիչներու համար, իսկ մնացեալ օրերը բաց են հասարակութեան համար։

Այս տարի կազմակերպիչները խոստացած են աւելի մեծ ուշադրութիւն դարձնել՝ ելեկտրական շարժանիւներու եւ կանաչ ուժանիւթով շարժիչներուն, քաղաքային շարժունակութեան (urban mobility) լուծումներուն եւ թեթեւ բայց հզօր շարժիչային մոտելներու։ Նաեւ կը ներկայացուին ապագայի շարժանիւներ՝ նոր տիզայնով, նորարար մարմիններով եւ խելացի (smart) համակարգերով։

Մարդիկ աշխարհի տարբեր կողմերէն կը հասնին Միլանօ՝ տեսնելու նորութիւնները, փորձելու շարժանիւները եւ վայելելու այն մշակոյթը, որ կը միացնէ ազատութեան զգացումը թեքնոլոժիք կատարելութեան հետ։ Բազմաթիւ այցելուներ իբրեւ տպաւորութիւն կը պատմեն, թէ այս ցուցահանդէսը ո՛չ միայն շարժանիւներու մասին է, այլ՝ մարդու եւ շարժման միջեւ յարաբերութեան։

Այս պատճառով EICMA-ն դարձած է ո՛չ միայն ցուցահանդէս մը, այլ շարժման տօն մը։ Այնտեղ կը հանդիպին երազներն ու երկաթը, հմայքն ու ճարտարագիտութիւնը, պատմութիւնն ու ապագան։

Եթէ կը սիրէք շարժանիւներու աշխարհը, հետաքրքրուած էք նորարարութեամբ եւ կը փնտռէք մշակոյթ մը, ուր արագութիւնը կը դառնայ արուեստ, ապա EICMA-ն այն վայրն է, ուր պէտք է այցելէք գոնէ անգամ մը ձեր կեանքի ընթացքին։

ՊԻԱՆՔԱ ՍԱՐԸԱՍԼԱՆ