ԱՐԵՒՄՏԵԱՆ ԵՒՐՈՊԱՅԻ ՀԱՅՐԱՊԵՏԱԿԱՆ ՊԱՏՈՒԻՐԱԿ Տ. ԽԱԺԱԿ ԱՐՔ. ՊԱՐՍԱՄԵԱՆԻ ՍՈՒՐԲ ԾՆՆԴԵԱՆ ՊԱՏԳԱՄԸ

Սիրելի՛ եղբայրներ եւ քոյրեր ի Քրիստոս,
սիրելի հաւատացեալներ Հայ Եկեղեցւոյ,,

Այսօր, Սուրբ Ծնունդի եւ Աստուածայայտնութեան մեծ տօնին, մենք զիրար կ՚ողջունենք այս ճշմարտութեամբ, որ կարծես ընդամէնը քանի մը բառեր են, սակայն, իրականութեան մէջ ամբողջ Աւետարանը՝ մէկ նախադասութեան մէջ։

Այս է Աւետիսը, Բարի Լուրը։ Սուրբ Գիրքի համաձայն եւ մեր Եկեղեցւոյ աղօթքներուն մէջ ինչո՞ւ այս Բարի Լուր է, ինչպէ՞ս այս Բարի Լուրը մեր ժողովուրդը դարերով պահած ու պահպանած է։ Ի՞նչպէս կրնայ այսօ՛ր ան Բարի Լուր ըլլալ մեզի համար։

Տիրոջ Ծննդեան սրբազան գիշերը հրեշտակը այսպէս ըսաւ հովիւներուն․

«Մի՛ վախնաք, ձեզի աւետիս մը պիտի տամ, որ ամբողջ ժողովուրդին մեծ ուրախութիւն պիտի պատճառէ։ Այսօր, Դաւիթի քաղաքին մէջ ձեր Փրկիչը ծնաւ, որ Օծեալ Տէրն է» (Ղուկ. 2․10–11)։ Հրեշտակի խօսքը կը սկսի յստակ կոչով՝ «Մի՛ վախնաք»։ Աստուած մարդկութեան չի յայտնուիր ահեղ զօրութեամբ կամ դատաստանի սարսափով, այլ՝ խոնարհութեամբ ու սիրով՝ որպէս Մանուկ։ Ան Էմմանուէլն է, այսինքն՝ Աստուած մեզի հետ է։

Եսայի մարգարէն աւետած էր․ «Ահա կոյսը պիտի յղիանայ ու որդի ծնի, եւ անոր անունը պիտի ըլլայ Էմմանուէլ», որ կը նշանակէ «Աստուած մեզի հետ» (Ես. 7․14, Մատթ. 1․23)։

Մեծ Աւետիսը այն է, որ Աստուած հեռաւոր եւ սառնասիրտ դատաւոր չէ։ Ան կը մօտենայ մեզի, կը մարդանայ, կը ծնի մսուրի մէջ, որպէսզի ո՛չ ոք վախնայ մօտենալ Անոր։

Հայ Եկեղեցին Սուրբ Ծննդեան կանոնի մէջ կ՚երգէ․ «Քրիստոս ի մէջ մեր յայտնեցաւ»։

Բեթղեհէմի Մանկան միջոցով Աստուած կը կիսէ մեր խոցելիութիւնը, մեզի պարգեւելով ուրախութիւն, խաղաղութիւն եւ յաւիտենական կեանք։

Յովհաննէսի Աւետարանը կը փառաւորէ․ «Եւ լոյսը խաւարի մէջ կը լուսաւորէ, բայց խաւարը չկրցաւ հասկնալ զայն» (Յովհ. 1․5), եւ յետոյ․ «Ե՛ս եմ աշխարհի լոյսը։ Ով որ ինծի կը հետեւի՝ խաւարի մէջ պիտի չքալէ, այլ պիտի ունենայ այն լոյսը, որ կեանքին կ՚առաջնորդէ» (Յովհ. 8․12)։

Մեզի՝ բոլորիս ծանօթ է խաւարը՝ մեղքը, վախը, խառնաշփոթը, ցաւը, բաժանումը։

Քրիստոս ծնաւ ճիշդ այդ խաւարը վերացնելու՝ լոյս բերելու համար։

Չկայ այնպիսի խաւար, որ զօրեղ ըլլայ Անոր լոյսէն։

Այսօր Ջրօրհնէքի արարողութեամբ, Հայ Եկեղեցին կը յիշատակէ Տիրոջ Մկրտութիւնը Յորդանան գետին մէջ եւ կը հռչակէ, որ ամբողջ արարչութիւնը կը սրբագործուի եւ մարդկութիւնը կը լուսաւորուի։ Քրիստոսի Ծնունդն ու Մկրտութիւնը արդէն իսկ կ՚ազդարարեն Խաչն ու Յարութիւնը։ Ան կը ծնի մեզ մաքրագործելու, մեզի նոր սկիզբ պարգեւելու համար։

Այս է Մեծ Աւետիսը․ մեր կեանքը անցեալի գերին չէ։ Քրիստոսով հնարաւոր են՝ ներումը, վերանորոգումը եւ նորոգուած սիրտը։

Աւելի քան 1700 տարի շարունակ եւ մինչ օրս, այս Աւետիսը ուժ տուած է հայ ժողովուրդին։

Երբ Ս․ Գրիգոր Լուսաւորիչ Աւետարանը քարոզեց Տրդատ Գ․ թագաւորին եւ մեր ժողովուրդին այս նոյն ճշմարտութիւնը աւետեց, ըսելով․ «Քրիստոս ծնաւ եւ յայտնեցաւ»։

Այդ օրէն ի վեր Ս․ Ծնունդն ու Աստուածայայտնութիւնը լոյսի աղբիւր հանդիսացան տարբեր արհաւիրքներու խաւար ժամանակներու մէջ։ Արշաւանքներու, հալածանքներու, նահատակութեան, 1915 թուականի ցեղասպանութեան եւ աշխարհով մէկ մեր ժողովուրդի ոչնչացման ընթացքին մեր Եկեղեցին շարունակեց ներբողել․ «Քրիստոս ծնաւ եւ յայտնեցաւ, ձեզի եւ մեզի մեծ աւետիս»։

Սիրելի հաւատաւոր ժողովուրդ, թագաւորութիւնները կրնան կործանիլ, կրնայ կորսուիլ հայրենիքը, բայց Քրիստոս յաւերժ է, Անոր լոյսը չի մարիր եւ Անոր սէրը չի լքեր Իր ժողովուրդին։

Մեսրոպ Մաշտոց ստեղծեց հայոց այբուբենը, որպէսզի Աստուծոյ Խօսքը ապրի մեր լեզուով։ Մեր Ս. Պատարագը, խաչքարերը, ողջ արուեստն ու մշակոյթը տոգորուած են այդ նոյն աւետիսով․ «Քրիստոս ծնաւ եւ յայտնեցաւ»։

Այսօր մենք՝ Հայ Եկեղեցւոյ զաւակներս, կը շարունակենք նոյն կենդանի օղակը՝ երբ կ՚ըսենք՝ «Ձեզի եւ մեզի մեծ աւետիս», կը միանանք մեր բոլոր նախնիներուն՝ Երեւանէն մինչեւ Գուգարք, Մուսա լեռէն մինչեւ Սիպիր, մինչեւ Լոս Անճելըս։

Այսօր ո՞րն է այն Բարի Լուրը մեզի համար։

Մեզմէ շատեր կ՚ապրին հայրենիքէն հեռու՝ մտահոգուած Հայաստանի կամ այլ վայրերու մէջ ապրող իրենց հարազատներուն համար։ Սիրտերու մէջ կայ կարօտ, անորոշութիւն, իսկ երբեմն նաեւ օտարութեան եւ միայնակութեան զգացում։

Հրեշտակի պատգամը այսօր ալ ուղղուած է մեր բոլորին․ «Մի՛ վախնաք»։

Քրիստոս կը ծնի նաեւ այստեղ, ուր մենք կ՚ապրինք։

Ան Էմմանուէլն է․ Աստուած մեզի հետ է՝ մեր տուներուն, մեր աշխատանքի, մեր ուսման եւ մեր լուռ արցունքներուն մէջ։

Այսօր Եկեղեցին մեզ կը հրաւիրէ ո՛չ միայն տօնելու, այլեւ անձնապէս ընդունելու այս Աւետիսը եւ զայն վկայելու։

Թո՜ղ Սուրբ Ծննդեան Լոյսը լուսաւորէ ձեզ, ձեր ընտանիքները, մեր սիրելի Հայ Առաքելական Սուրբ Եկեղեցին եւ համայն հայ ժողովուրդը։

«Քրիստոս ծնաւ եւ յայտնեցաւ,
Ձեզի եւ մեզի մեծ աւետիս»։