ԷՔԻՒՄԵՆԻՔ ԱՐԱՐՈՂՈՒԹԻՒՆ

Երէկ յետմիջօրէին, Նիկիոյ առաջին տիեզերաժողովի 1700-ամեայ յոբելեանին առթիւ, միջեկեղեցական հանդիսաւոր աղօթք մը տեղի ունեցաւ՝ Նէոփիտոս հնավայրին մէջ։ Արարողութեան հանդիսապետեցին Հռոմէական Կաթոլիկ Եկեղեցւոյ Քահանայապետ Լեւոն ԺԴ. Սրբազան Պապն ու Ուղղափառաց Տ.Տ. Պարթոլոմէոս Ա. Տիեզերական Պատրիարքը։ Նէոփիտոսը այս առթիւ վերածուեցաւ համաքրիստոնէական ժամադրավայրի մը, ուր համախմբուեցան Արեւելեան Ուղղափառ եկեղեցիներու բարձրաստիճան ներկայացուցիչները եւ համայն աշխարհէն քրիստոնեայ հոգեւոր պետեր։ Թուրքիոյ Հայոց Պատրիարք Ամեն. Տ. Սահակ Ս. Արք. Մաշալեան այս պատմական արարողութեան մասնակցեցաւ՝ ներկայացնելով Տ.Տ. Գարեգին Բ. Ամենայն Հայոց Կաթողիկոսն ու Մայր Աթոռ Սուրբ Էջմիածինը։ Ամեն. Ս. Պատրիարք Հօր ընկերացաւ Տ. Արամ Արք. Աթէշեան։ Նորին Ամենապատուութիւնը արարողութեան ընթացքին իրեն վիճակած աղօթասացութիւնը կատարեց անգլերէնով։ Էքիւմենիք աղօթքին ներկայ էր նաեւ Մեծի Տանն Կիլիկիոյ Կաթողիկո-սութեան ներկայացուցիչը՝ Տ. Կոմիտաս Արք. Օհանեան։

Արարողութեան մասնակիցները կանթեղներ ի ձեռին առ Աստուած աղօթք բարձրացուցին՝ աշխարհի խաղաղութեան եւ մարդոց միջեւ հանդուրժողութեան, համակեցութեան համար։ 

Ամեն. Ս. Պատրիարք Հայրը եւ արարողութեան մասնակիցները, որոնք ուղղաթիռով մեկնած էին Իզնիք, երէկ երեկոյեան իսկ վերադարձան Իսթանպուլ։