ՆՈՐՈՒԹԵԱՆ ՇՈՒՆՉԸ

Երէկ, Ֆէրիգիւղի «Տերվիշ Էրօղլու» մշակոյթի կեդրոնի համալիրէն ներս գումարուեցաւ Թաքսիմ մարզակումբի հերթական ընդհանուր ժողովը, որու արդիւնքով ընտրուեցաւ նոր վարչութիւն մը։ Համայնքային շրջանակներուն ուշադրութիւնը ամբողջութեամբ կեդրոնացած էր այս իրադարձութեան վրայ՝ մինչ ակումբի համագումարը թրքահայ մարզական կեանքին վերաբերեալ անկիւնադարձային իրադարձութեան մը վերածուեցաւ։ Թաքսիմ մարզակումբը երկար տարիներէ ի վեր քարացած մտայնութիւնով մը կը կառավարուէր, իսկ այս անգամ արդէն ակումբի ընդհանուր ժողովի անդամներու հաւաքական կամքը դրսեւորուեցաւ՝ նորութեան շունչը բերելով։ 

384 հոգի մասնակցեցաւ ընդհանուր ժողովին։ Համագումարը կազմակերպուած էր պատշաճութիւններու սահմաններուն մէջ։ Դիւանը ընդհանուր ժողովի գործադրութեան ձեռնարկեց՝ պարզելով, որ քուորումը բաւարար էր։ Առաւօտեան կանուխ ժամերէն սկսեալ մեծ եռուզեռ մը նկատելի էր՝ այս ընդհանուր ժողովին համար։ Թէեւ ատեն-ատեն լարուածութիւններ ծագեցան, իրաւապահ մարմիններուն միջամտութիւնը անհրաժեշտ դարձաւ, սակայն, ի վերջոյ օրակարգի գործադրութիւնը ի կատար ածուեցաւ։ 

Շաբաթներէ ի վեր համայնքային շրջանակները արդէն կը հետեւէին, որ Թաքսիմ մարզակումբի ընդհանուր ժողովը՝ Ալէն Պաղի կողմէ գլխաւորուած կարմիր եւ Հրաչ Քեչիեոլուի կողմէ գլխաւորուած դեղին ցուցակներու մրցակցութեան թատերաբեմը պիտի հանդիսանար։ Արդիւնքին, 223 ձայն ստացաւ կարմիր ցանկը, իսկ 161 ձայն՝ դեղին ցանկը։ Այսպէսով, Ալէն Պաղ եւ գործակից ընկերները իրաւունք շահեցան Թաքսիմ մարզակումբի վարչութեան ղեկը ստանձնելու յառաջիկայ շրջանին։ 

Հարկ է նշել, որ համագումարի կազմակերպուած մշակոյթի կեդրոնը այցելեց նաեւ Իսթանպուլի երեսփոխան Սեւան Սվաճըօղլու, որ երկու կողմերուն յղեց յաջողութեան մաղթանքներ։ Թաքսիմ մարզակումբի ընդհանուր ժողովի արդիւնքը ողջունելի համարուեցաւ համայնքային շրջանակներուն կողմէ՝ մինչ կարմիր ցանկի նորընտիր երիտասարդ վարչայինները շնորհաւորութիւններ եւ խրախուսական մաղթանքներ կը ստանան բոլորէն։